SHILLONG: West Jaintia Hills a·jani Mukhla songo Dairy Complex-ko rikna gita Budbar salo a·dokni Chief Minister Conrad Sangma, pangchakaniko songe on·angaha aro iana pangchakaniko songe on·angani somoio jinmana aganprakangengon, ia Dairy Complex-ko rika matchotahaon game ge·e cha·enggipa manderangoni komibeoba sak 2000-na baten kamrangko on·na man·gnok ine an·tangni ka·dongchakenganiko parakangaha.
West Jaintia Hills a·jao ia Dairy Complex-ko rikna gita gong kror 9-na baten tangka paisarangko India sorkarini National Program for Dairy Development-ni ning·o chame on·enga aro ia Dairy Complex-ara a·doko ra·gatgipa Dairy Mission-ni bak ong·engachim.
“Ia project-ko ra·gatanichi chinga manderangna aro mongsongbate chadamberangna janggi tangani cholrangko on·na jotton ka·enga,” ine ia tom·anio Sangma aganaha.
Meghalaya a·doko dudrang chu·ongjaengani a·sel manderang neng·nikanirangko chagrongna nangtokenga ine janapatengon, ia Dairy Complex-ko a·bachengatanichi a·doko dud chu·onggijaniko namatna man·gnok ine Chief Minister parakataha.
“Meghalaya a·doko bilsiantian litre lak 200-na bate nangengoba litre lak 12-mangni gita dudrangkosan man·engani gimin ian sorkarina kajinako man·dapanisan ong·aigija kamrangko nakatate on·ani cholba ong·enga,” ine Chief Minister aganaha.
Bilsiantian a·doko komibeoba sak 50,000 chadamberangna kamrangko tikate on·na nangengani gimin sorkarina dal·bea ra·biani ong·enga aro iani giminsa sorkari, dingtang dingtang kamrango janggi tangani cholrangko bikote on·na jotton ka·enga ineba Sangma aganaha.
Jowai-ni Maternity & Child Hospital-ko bakan kulie on·gnok ineba ia tom·anio Chief Minister, jinmana parakataha.
Ia Dairy Complex-na pangchakaniko songe on·angani somoio Chief Minister baksana Jowai-ni MLA Wailadmiki Shylla aro dingtang dingtang officer-rangba dongpae bak ra·angaha.
