SHILLONG: Maming niam donna gri India sorkari baksa agangrikna nangnike Hynniewtrep National Liberation Council (HNLC) bobil dolni seatgipa chittiko Bristibar salo Meghalaya sorkari man·soaha.
Bristibar salo, a·dokni Home Minister Lahkmen Rymbui-ni kobor ra·timgiparangna parakatani gitade, maming niam donna gri agangrikna kusi ong·enganiko HNLC bobil dol, a·dokni Chief Minister Conrad Sangma-na seataha aro ia apsan chittikon a·dokni Deputy Chief Minister aro Home Minister-naba watataha.
A·doko tom·tomaniko ra·bana miksonganio sorkari, HNLC bobil dolni nangnikani gita ku·baltitimgipako sandina a·bachengengaha ine janapatengon, a·dokni aro a·doko songdongenggipa manderangni namgnina ia kamko sorkari sikkele dakna nangnikjaenga ine Home Minister parakataha.
Iani bidingo a·dok sorkari, bakan ma·mong sorkarina u·iatskagnok ineba Rymbui parakataha.
Sorkari baksa agangrikna tarianiko HNLC bobil dolni parakatani ja·man, sorkari baksa agangrikna nangnikaniko see u·iatchina gita a·dokni Chief Minister, HNLC dolko didiatahachim.
HNLC bobil dolni agangrikna chol on·enganiko sorkari ra·chakenga indiba uamangni agangrikna nangnikenganiko uamang seachi sorkarina u·iatna nangskagen ine a·dokni Chief Minister Conrad Sangma aganahachim.
