SHILLONG: NPP-chi dilenggipa MDA sorkario Congress dolni sakbonga MLA-rangkoba rimnapahani gimin Sukrobar salo, BJP-ni dilgiparang, Shillong songjinmao donggipa BJP office-o tom·e chanchirimangaha aro iani bidingo a·dokni Chief Minister Conrad Sangma-na sedoate, talataniko on·china dabina tik ka·angaha.
Iani bidingo kobor ra·timgiparangna talataniko on·angengon, BJP-ni bak ong·paenggipa MDA sorkario Congress dolni MLA-rangkoba rimnapahani gimin BJP-ni dilgiparang suk ong·gijaniko paraktokaha aro iani bidingo BJP-ni dilgiparang, chief minister-na sedoate, talataniko on·china dabina tik ka·angaha ine Sukrobar salo, BJP-ni state president Ernest Mawrie parakataha.
“MDA-o Congress dolni MLA-rangko rimnapahani gimin chingo jajaani ong·enga aro chief minister-ni kamo suk ong·tokjaenga. Uni gimin chinga iani bidingo chief minister-na sedoate chingna talataniko on·china u·iatgen,” ine BJP dolni tom·a matchotani ja·mano BJP-ni state president, kobor ra·timgiparangna aganaha.
India a·song gimikon BJP aro Congress dolni gisepo meli nangrime kam ka·anirangko nikna man·a dongkujachim aro Meghalaya a·dokni MDA sorkario BJP dolba bak ong·skaengachim ine nikna man·a.
Indake ong·engon, MDA-o bakrimna gita Congress dolni see on·aniko BJP-na mesokna nanggen ineba Mawrie parakataha.
Iani bidingo Meghalaya a·dokko nirokenggipa BJP-ni dilgipa Dr Ao Chuba-ba talataniko on·angengon, MDA sorkarina Congress dolni chakpaaniko on·ani bidingo see on·ani donggenchimode BJP dolna maming neng·nikani dongjawa ine parakataha.
“Chinga a·bachengonin Congress doloni jakgitel ong·gipa a·songko ong·atnasa krenge kamko ka·enggiparang ong·ani gimin sorkariko chalaianio apsan kamko ka·rimna kraja indiba Congress dolni chakpaaniko on·ani bidingo see on·ani donggenchimode chingo maming neng·nikani dongjawa,” ine Ao aganaha.
Meghalaya a·doko Congress dolni sakbonga MLA-rangba National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko on·na re·baahani gimin Congress baksa nangrime kam ka·anio maming neng·nikani dongjawa ine adita salrangna skangsan, a·doko sakgni BJP MLA-rangoni saksa Sanbor Shullai-de aganahachim ine nikna man·a.
BJP, Congress, HSPDP pilakan ramram political dolrangsan ong·aia ine janapatengon, a·dokna nangrime kam ka·anisa mongsongbatgipade ong·aia ine South Shillong-ni BJP MLA aganahachim.
