Mendipathar: North Garo Hills-o Garoland State Movement-ni sakgni a·gipi dilgiparang- chairman Balkarin Marak aro Rayan Marak-mang Court-ni interim bail on·ako bon·atani ja·man kate dongenga.
Sakgni dilgiparang aro gipinrangko Mendipathar-o petrol pump-oniko tangka ra·sekani gimin aro uamangni dabia tangkako petrol pump-ni manager ong·jani gimin drae pump-ko chipatani gimin matnanga man·aha.
FIR segatani gitade, dos dakgipa dolrang, petrol pump-ni manager-ko lak 10 tangka on·china dabiaha. Uandake GSMC memborrang, petrol pump-ko brine palenga ine matnangaha.
Tangka ra·sekgipa dolo Nrilen Deka-ba dongpaa. Deka-ko skangba Tura Hawakhana- ka·mao donggipa SC Das petrol station-oniko an·tangko oil company-ni representative ine dakmike tangka dabiani gimin WGH police rim·ahachim.
Batangimin January 6 tariko GSMC dilgiparang, sakgipin dos dakgiparang baksa proprietor Prakash Ch Momin-ni petrol pump-o nape pump-o kam ka·gipako dokaha. Uamangni adita bol ra·anggipa garirangoba drae toko chipaha, jena tangkako gamjaha. Pump-ni chabikoba ra·e katahachim indiba pump station-ni nokgipani FIR ka·a ja·man chabiko on·pilaha.
A·sel ong·a obosta chu·gimikkon petrol pump-o dongipa CCTV-o nikna man·aha. Unbaksana obosta ong·ako mikrontangchi nipgiparangba donga.
A·sel ong·a aro FIR ka·ani ja·man North Garo Hills Mendipathar police am·sandianiko a·bachengataha aro sakbri manderangko rim·aha. Balkarin aro Rayan- mang jokaha aro court-oniko interim bail man·aha.
Indiba mamlako hearing ka·ani ja·man, Court, uamangna on·gipa interim bail-ko bon·ataha, indake da·ora sakgni dilgiparangan kate dongenga.
“Uamangko rim·na sandienga, ia mamlako ta·raken chu·sokaniko man·a ka·dongenga ine NGH superintendent of police Abraham T Sangma aganaha.