SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) dolba tom·tomaniona re·bapilna gita sorkari baksa agangrikna parakatahani gimin Sonibar salo, People’s Democratic Front (PDF) dolba kusi ong·aniko parakataha.
“HNLC bobil dolni tom·tomaona re·bana gita sorkari baksa agangrikna manchiahani gimin chinga namen kusi ong·a maina ian a·doko tom·tomaniko ra·bapilna chol ong·engaha,” ine Sonibar salo, PDF dolni tom·a matchotani ja·man, PDF-ni president aro a·dokni Cabinet Minister Banteidor Lyngdoh, kobor ra·timgiparangna parakataha.
Ia chang HNLC bobil dolni sorkari baksa agangrikani songbadrangosan bon·chipaigija chu·sokgipa ong·gen ineba ua an·tangni ka·dongchakenganiko parakataha.
Re·anggipa February-ni 9 tariko HNLC bobil dolni agangrikna skaniko seachi sorkarina u·iatani ja·man, dolgnini gisepo agangrikaniko dakna gita ku·baltitimgipako seokna bimingrangko tik ka·manaha ine sorkari parakatahachim.
Congress MLA sakbongani MDA sorkario bakrimegipa bidingo janapatskaengon, ia MLA-rangni MDA-o bakrimeaniara MDA sorkariko mangrakbatatani gitasa ong·engani gimin uamang iani bidingo maming jegalani dongjawa ine PDF-ni president parakatskaaha.
Lyngdoh-ni aganani gitade, Congress MLA-rang MDA sorkario bakrimgenchimoba da·o dipet Cabinet-ko sualpiltaiani dongkujawa ine Chief Minister Conrad Sangma an·tangan parakmanahani gimin uamango maming neng·nikani dongjawa.
Congress MLA-rangni MDA-o bakrimaniko BJP-ni jegalenggipani gimin janapatskaengon, ia meligrikgijaniko namatanide BJP aro chief minister-ni daitosa ong·a ine PDF-ni president parakataha.