SHILLONG: Sonibar saloni Robibar salona konta 24-ni gisepo Meghalaya a·dok gimiko sak 58 manderang COVID-19 man·daptaiaha aro ia apsan salon a·doko mande saksa COVID man·e siangdaptaiaha.
Konta 24-ni gisepo COVID-19 man·dapgipa sak 58 manderangko channe da·o Meghalaya a·dok gimiko COVID-19 man·e dongenggiparang sak 751-ona tang·onangaha indiba ia apsan salon mande saksa COVID-19 man·e siangdaptaiahani gimin a·dok gimiko COVID man·e sianggiparangara gimik sak 1562 gapskaengaha.
Konta 24-ni gisepo COVID man·gipa sak 58 manderangoni, sak 21-de East Khasi Hills-o, sak 1-de Eastern West Khasi Hills-o, sak 6-de North Garo Hills-o, sak 3-de Ri Bhoi a·jao, sak 5-de South West Garo Hills-o, sak 3-de South West Khasi Hills-o, sak 14-de West Garo Hills-o, sak 4-de West Jaintia Hills-o aro sak 1-de West Khasi Hills a·jao ong·a.
Salsani gisepo COVID man·e sianggipa mande saksara East Khasi Hills a·jao ong·a.
Ia apsan salon gimik sak 156 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 90,678 gapskaengaha.