SHILLONG: NPP-chi dilenggipa MDA sorkario bakrimaniko on·ahani gimin Meghalaya a·doko Congress dolni sakbonga MLA-rangko suspend ka·na ba Congress-o membor ong·aoniko dontongatna gita All India Congress Committee (AICC) bilko on·ahaoba, Congress MLA-rang, MDA sorkario bakrimaniko ra·piljana gita tik ka·angskaaha.
Sombar salpaksachibara, Congress dolni sakbonga MLA-rang, kontagnimangna tom·e, mikkangchi ja·ku de·gnini gimin chanchirimangaha.
Tom·a matchotani ja·mano kobor ra·timgiparangna u·iatengon, da·o dipet uamangko Congress doloniko ra·galchina AICC-ni ge·etgipani bidingo uamang maming u·iatanirangko man·soa dongkuja ine Congress MLA PT Sawkmie parakataha.
Meghalaya a·doko Congress, opposition dolo ong·a intalan Congress MLA-rangni constituency-rango maming namroro silroroani kamrang dongjaha ine janapatengon, da·o uamang MDA sorkario bakrimengoba a·dokni nangchongmotgipa kamrangnade ku·rangko on·angaikugen ine Sawkmie parakataha.
“Pilakni namgninan chinga term bon·kujaskalde MDA-na chakpaanirangko on·angkugen,” ine Congress MLA aganaha.
Congress dolni sakbonga MLA-rang MDA sorkario bakrimaniko on·manahani gimin uamangni bakrimaniko ra·pilgija batesa, a·dokni dingtang dingtang nangchongmotgipa kamrangko chu·sokatna gita uamang sorkariko bilakatna dakchakgen ineba Sawkmie parakataha.
Sawkmie-ni aganani gitade, a·doko ILP-ko ra·gatchina dabiani, simarango meligrikgijani, Khasi aro Garo ku·sikrangko Eighth Schedule-o ra·gatani bidingo Congress MLA-rang, MDA sorkarina chakpaaniko on·enga.
Congress dolni sak 12 MLA-rang, All India Trinamool Congress (AITC)-o napangani somoiode maini gimin AICC ku·rangko on·jaha ineba ua, Congress dolni sakbonga MLA-rangko suspend ka·na aganani gimin sing·doangaha.
