TURA: Mongolbar pringo AS-01AC 0992 Tata Magic gari bolsako East Garo Hills a·jao wa·al kamgopaha.
Koborko on·ani gitade, Mongolbar pring 9:30 bajimango ia gari, Songsak antioni re·bapilengachim indiba garini engine ning·o maiba nosto ong·changani a·sel ia gari rang·san wa·al ching·gaoaha aro garini driver, mamingkoba dakna man·jae kate chakna nangaiaha.
Gariko salgipa mandeni bimingara Lingbath N Sangma ong·achim indiba gariko kamgopanio garini registration certificate baksana pilak bosturangkon kamgopahani a·sel gari nokgipani bimingkode ma·sina man·jaha ine East Garo Hills a·jani police officer-rang parakataha.
Gariko kamani ja·mano Police Fire Service-ni garirang ua biapona re·ange wa·alko kimiteaha indiba ua somoio gariko chu·gimik wa·al kamsomanaha ine kobor on·aha.
