Jengjal MDC-ko NGO-rang GHADC compound-oniko a·rikgala

 

TURA: Garo Hills Autonomous District Council (GHADC)-ni gital chief executive member (CEM) Rakesh Sangma-ko ra·galpilchina dabie Garo Hills gimikni NGO-rang, GHADC-ko kam ka·na on·gija jingjengatengon, NGO-rangni jingjengataniko manigija GHADC quarter-ona re·angahani gimin Jengjal-ni MDC Grahambell A Sangma-ko jinma a·rikgalataha.

GHADC-ni gital CEM Rakesh Sangma-ko ra·galchina ba ua an·tangan kamtangko watchina dabitokengoba da·onan maming ja·kurangko de·jaengani gimin Garo Hills gimikni NGO-rang, Sombar salo jinma kotok baksa GHADC-ona napdraangenba jegalanirangko daktokahachim aro Mongolbar saloni Sukrobar salona kingking GHADC office-ko kam ka·na on·gija jingjengatengachim ine nikna man·a.

Indake ong·engon, Mongolbar salo Jengjal-ni MDC Grahambell Sangma-ko GHADC-ni quarter-ona re·angako ma·siani ja·man GHADC-o jingjengatenggipa manderang jinma, quarter-ona re·ange MDC-ko ua biaponiko chrik a·boke a·rikgalattokaha.

Rasong gnange ua somoio GHADC-o so·sojengjeng ong·ako nirokenggipa magistrate aro police-rang manderangko chadrapjachina mol·molaha aro uandaken ja·mano manderang ia MDC-ko maming saknaani gri ua biaponi re·angna on·aha.

Ia apsan salon, GHADC-ni Joint Secretary PR Marak-ni office-ona re·angahani giminba NGO-rang raken jegalgrimtokaha indiba ja·mano ua biapo so·sojengjeng ong·aniko nirokenggipa Additional Deputy Commissioner MT Sangma-ni jegalenggipa dolrangna talatani ja·manosa Marak-koba ua biaponiko re·angna on·aha.

GHADC-oni koborko on·ani gitade, GHADC-ni pilak officer-rangkon biaptangtango donge kam ka·china GHADC-ni Secretary ge·etaniko on·ahani giminsa Joint Secretary PR Marak-ba GHADC-ona re·angahachim indiba uni office-oni ong·katako nikrikon jegalenggipa dolrang, ua office-o kam ka·enga ine ma·sisretenba uni kosako chrik a·bokanirangko dakna a·bachengahachim.

Gital CEM-ko ra·galkujaskal ba ua an·tangan kamko watkujaskal NGO-rangni jingjengataniko dontongjawa ine parakmanahachim.

Get real time updates directly on your device, subscribe now.

Comments are closed.