SHILLONG: COVID-19-ko warachakna dongimin niamrangko da·o dipet olgrokdapatkujawa ine Meghalaya a·dokni Health Minister James PK Sangma parakataha.
Health Minister-ni aganani gitade, da·ororo COVID-19-ko man·giparang a·doko komiroroangengahani giminsa adita salrangna skang mitam niamrangkode olgrokatahachim.
“Da·ororo COVID-19-ko man·giparang komiroroangengoba an·ching mikrake donganiko watgalkujana aro manderangni namgnina chinga niamrangko da·o dipet olgrokdapatkujana tik ka·aha,” ine Sangma aganaha.
Da·ororo a·doko ong·enggipa obostarangni gimin janapatengon, ia sal somoirango COVID-19-ko man·giparang komiangengani giminsa mitam niamrangkode sorkari olgrokataha aro bakan a·dokoba skango gitan obostarang nampiltaina ka·dongenga ine Health Minister parakataha.
A·doko niamrangko olgrokataniara sorkarini ong·enggipa obostarangko ma·sigijanikosa mesokani ong·aha ine adita salrangna skang, All India Trinamool Congress (AITC)-ni dilgipa Mukul Sangma-ni matnange agangipani bidingo sing·on, “Dr Mukul saksa dal·gipa dilgipa ong·a aro ua an·tangni chanchianiko aganna bil donga. Indiba iandakgipa kattarangko uni agananiara namen kragijani ong·enga. An·tangtangko on·kange manderangni namgnina kam ka·enggiparangko ua iandake matnangna nangja,” ine Sangma parakataha.
