Boldamgre-ni Trinamool MDC, an·tangni manderang baksa NPP-o napanga

SHILLONG: Re·anggipa Bristibar salo, Boldamgre GHADC constituency-ni All India Trinamool Congress (AITC) MDC Stevie Marak, an·tangna kamko ka·enggipa bang·bea manderang baksa National People’s Party (NPP)-o napangaha aro uamangko NPP-ni national president Conrad K Sangma baksana NPP-ni national vice president Prestone Tynsong rimchaksoaha.
GHADC-ni MDC-ko NPP-ona rimchaksoani ja·man, a·dokni Chief Minister aro NPP-ni national president Conrad Sangma kobor ra·timgipa manderang baksa agangrikengon, Boldamgre-ni MDC Stevie Marak, South West Garo Hills a·jao saksa mongsonggipa dilgipa ong·a aro da·o ua NPP-ona re·baahani gimin 2023 bilsini Assembly election-o NPP dol, South West Garo Hills a·jao komibeoba seat damsakode chena man·gnok ine an·tangni ka·dongchakenganiko parakataha.
“Anga Marak aro una chakpaenggipa ritchani ritcha manderangko NPP-ona rimchaksoenga,” ine Sangma parakataha.
NPP national president-ni parakatani gitade, da·o dipet South West Garo Hills a·jao NPP-ni MLA saksaba dongkujaengani gimin dilgipa saksakode man·na krenge kamrangko ka·engachim aro da·o Boldamgre MDC-ni NPP-ona re·baanian uamangna ka·dongataniko ra·baani ong·aha.
Garo Hills-o AITC-ni MLA sakgniba NPP-o napna miksongenga ine jangbingbangenggipa kattarangni gimin janapatengon, “Garo Hills-osan ong·aija indiba bang·a manderangan NPP-o napna gita ching baksa agangrikenga. A·dokni namgnina chinga bilakgipa dolko rikna kam ka·enga,” ine Sangma parakataha.
South West Garo Hills a·jao Boldamgre GHADC constituency-na kamko ka·anio AITC-ni gita maming dakchakanirangko man·jahani gimin suk ong·jae NPP-o napskana miksongengaha ine adita salrangna skangsan da·o NPP-o napanggipa MDC Stevie Marak parakatahachim.
Marak-ni parakatani gitade, Boldamgre GHADC constituency-ba Ampati Legislative Assembly Constituency-ni ning·o ga·akgipa constituency-an ong·achim indiba joltangni MLA uni constituency-na maming dakchakanirangko on·jahani gimin ua suk ong·jae NPP-o napskana manchiaha.
Meghalaya a·doko NPP bilakbatrorobaenga aro mikkang bilsini election-oba NPP dolan gnigipa changna sorkariko rikpiltaiani cholrang donga ineba Marak aganaha.