SHILLONG: Ma·mong sorkariba a·doko bobil dake chakatenggipa Hynniewtrep National Liberation Council (HNLC) dol baksa agangrikna nangnikenga ine Bristibar salo, a·dokni Chief Minister Conrad K Sangma talatangenba, antisani gisepon bobil dol baksa agangrikna kamrangko a·bachengna man·gnok ine parakataha.
HNLC bobil dol baksa agangrikna ja·ku de·anirangko parakaniara una kraani ong·jawa ine janapatengon, da·o dipet uamang India sorkarioniko namgipa aganchakaniko man·aha inesan aganna man·kuaigen ine Chief Minister parakataha.
HNLC bobil dol baksa agangrikna ku·baltitimgipako seokani bidingo janapatengon, “Ku·baltitimgipani kamna chinga adita sak manderangko minge donmanahachim indiba chingona bimingrang sokbakuenga. Chinga iani bidingo Cabinet aro official-rang baksa name chanchirimesa ku·baltitimgipako seokna nanggen,” ine Chief Minister parakataha.
Re·anggipa Budbar salosan a·dokni Chief Minister Conrad Sangma, HNLC bobil dolni agangrikna tariani bidingo New Delhi-ona re·angenba, Union Home Secretary Ajay Kumar Bhalla-ko gronge agangrikbaahachim. Maming niam donna gri ia bobil dol sorkari baksa agangrikna kusi ong·enga ine CM, Union Home Secretary-na talate on·baahachim.
HNLC bobil dol baksa agangrikaniko ta·raken a·bachengatna man·na gita ku·baltitimgipako seokani giminba ua ma·mong sorkari baksa agangrikbaaha.
Chief Minister-ni Delhi-ona re·angani somoio Union Home Minister Amit Shah-de Uttar Pradesh aro gipin a·dokrango election-na jakchakgija ong·engani gimin grongbana man·skajahachim.
