Tura: Ma·mong sorkarini, SSA teacher-rangna dormahako on·na watatgipa tangkako a·dok sorkari jakkalsreta ine matnangenba, uamangna dormahako on·angja ong·ode All Garo Hills SSA School Teachers’ Association (AGHSSASTA), jingjengatna ka·mikkenataha.
“Ma·mong sorkari re·anggipa bilsion tangkako watataha ine chinga koborko man·aha. Indake ong·ode, maina a·dok sorkariara chingni dormahako on·na neng·nikenga,” ine AGHSSASTA-ni president L G Momin aganaha.
A·dok sorkari, teacher-rangni dormahako on·na chu·sokjanio pangnan ma·mong sorkariko jaksi ote aganronga, indiba kakketde a·dok sorkarisa, SSA teacher-rangni dormahani tangkako jakkalsretenga, ineba teacher-rang matnangaha.
Uandake teacher-rang media-ni gita, Chief Minister Conrad Sangma-ko uamangni man·kugijagipa (October-oni Feb) dormahako March 1 tarikni gisepon on·china dabiaha.
“Dormahako man·jaengani gimin chinga baditan duk neng·nikako chagrongna nangenga, bi·sarangni school fee, bijolini fee ba uandakgipa nanganirangko gamna man·jaenga. Salanti janggi tanganio nanggipa bosturangkon man·jaenga, baditan kosto chakna gita nangenga. Indiba an·chingni songsul Assam, Arunachal Pradesh aro gipin a·dokrangode jaantian maming neng·nika gri teacher-rang dormahako man·enga.”
Indake ong·engon AGHSSASTA, uamangni man·kugijagipa dormahako March 1 tarikonan on·angja ong·ode, March 2 tarikoni dormahako man·kuja dipetna school-rangko chipate jingjengatna parakataha.
“Okumu chakede chinga kamtangko ka·angna man·jawa, chingasan ong·aija darangba man·jawa, uni gimin iandakgipa dal·bea ja·kuko de·na tik ka·aha. Chingni neng·nikarangko maidake a·dok sorkariara u·ichakna man·jaenga, ine teacher-rang aganangkuaha.
