SHILLONG: West Khasi Hills a·jani Shallang jolo donggipa koela a·kolo Assam-oni mande sakgni siangani ja·man, ia koela a·kolni nokgipa Robibar salo an·tangko police-rangna bame on·eaha.
West Khasi Hills a·jani Superintendent of Police (SP) Herbert G Lyngdoh-ni u·iatani gitade, Kyllon Mathei-ni Alfred Rongrin, Shallang police station-ona re·bae an·tangko bame on·eaha aro uni bame on·eani somoio uni nokdangni manderangba unbaksa re·baaha.
Adita salrangna skang, Assam Boko joloni bilsi 35 ong·gipa Sukur Ali aro bilsi 35 ong·gipa Ainuddin Ali, Alfred Rongrin-ni ge·etaniko man·enba, West Khasi Hills a·jani Langmar songo galchipe donenggipa koela a·koloniko koela bikotna gita re·angahachim indiba koela a·kolo uamang sakgnian rang·sisokjae siangna gita nangahachim.
A·sel ong·ani ja·mano, police-rangna u·iatchenggija sianggipa mande sakgnini manggisiko uamangni ripengrang, uamangni nokona ra·angaha aro koela a·kolni nokgipaba ua somoionin katchipe donengachim.
Ia a·selni bidingo police-rang, MMDR Act-ni ning·o Shallang police station-o mokordomako ka·ahachim.
Koela nokgipani an·tangko bame on·eani ja·man, police-rang uko rim·aha ine kobor on·aha.