GHADC-ni gital CEM-ko ra·galchina dabianio agangrikani chu·sokjani gimin CM, CEM-ni bimangrangko tarie so·a

TURA: Garo Hills Autonomous District Council (GHADC)-ni gital chief executive member (CEM) Rakesh Sangma-ko ra·galpilchina dabitokengon, Sombar salo sorkarini dilgiparang baksa agangrikaniba chu·sokgipa ong·jahani gimin jegalenggipa dolrang, Mongolbar salo, a·dokni chief minister Conrad Sangma aro gital CEM Rakesh Sangma baksana gipin MDC-rangni bimangko tarienba, Garo Hills-ni dingtang dingtang biaprango so·e galskaaha.
GHADC-ni gital CEM-ko ra·galpilchina dabie jingjengataniko dontongchina re·anggipa Sombar salosan sorkarioni watatako man·gipa MLA-rang, jegalenggipa NGO-rangko Tura circuit house-o gronge agangrikahachim aro gital CEM-ko ra·galchina dabienggipani bidingo chanchina gita salgittam somoiko sorkari ra·angahachim ine nikna man·a.
Indake ong·engon, GHADC office-ko kam ka·na on·gija jegalenggipa dolrang, jingjengataniko dontongna jechakskaenba, a·bachengo tik ka·gimin gitan Sukrobar salonan GHADC office-ko picketing ka·angskaengachim.
GHADC-ni gital CEM-ko ra·galpilchina dabianiko indita salrangni ja·manoba NPP-ni dilgiparang aro CEM an·tangba knachakjaengani gimin Mongolbar salo, jegalenggipa dolrang, Tura, Baghmara aro Chokpot-oba CM, CEM aro NPP MDC-rangni bimangrangko tarie so·e galtokaha.
“GHADC-ni gitcham CEM Benedic Marak-ko ra·galanio aro Rakesh Sangma-ko gital CEM songanio a·dokni CM Conrad Sangma-an jak donga ine chinga namen ma·sienga. Da·o ua district council-ni kamrangode jak on·jawa ine a·kangskaenga. Ia pilakan NPP sorkarini dakmikaniko mesokani ong·a,” ine GSU-ni president Tengsak Momin parakataha.
Indake ong·engon, gital CEM-ko ra·galpilchina dabie, re·anggipa antionin GHADC office-ko picketing ka·engani a·sel pilakni gitan noksan ong·atako man·na nangengaha ine GHADC-ni deputy CEM Nikman Ch Marak parakatenba, ia meligrikgijaniko ta·raken namatchina gita sorkari aro jegalenggipa dolrangko didiataha.
“GHADC-o ong·enggipa obostarangko nike, obostarangko namaona ra·bapilna gita ta·raken kamko ka·na nangengaha ine anga chanchia. Jegalenggipa dolrang baksa sorkari agangrikna a·bachengahani gimin ia neng·nikani ba meligrikgijaniko ta·raken namatna man·gen ine anga bebera·a,” ine Marak parakataha.