TURA: Garo Hills Autonomous District Council (GHADC)-ni gital chief executive member (CEM) Rakesh Sangma-ra Babelapara constituency-o a·songni dongimin niam gita seokako man·gipa MDC-sa ong·a aro uko MDC-rangsa jinma namnike CEM songahani gimin jegalako man·na kraja ine United Democratic Party (UDP)-ni MDC Ashahel D Shira parakatenba, jingjengataniko dontonge GHADC-o kamrangko ka·na on·piltaichina NGO-rangko mol·molataha.
Shira-ni parakatani gitade, jegalako man·enggipa Rakesh Sangma-ra badiaba dol ba mande saksani songako man·gipa member ong·ja indiba uni constituency-o manderangni namnike seokako man·gimin MDC-sa ong·ani gimin uni kosako iandake jegalaniara a·songni dongimin niamko pe·ani gita ong·engachim.
“Rakesh Sangma-ko Babelapara constituency-ni manderangsa namnike district council-ni member-na seokaha aro ja·mano MDC-rangsa majority ong·e CEM-ni kamna uko songaha. A·songni dongimin niamo seokako man·gipa member ong·e kamtangko ka·na jegalako man·aniara namen kragijani ong·enga aro ian a·songni democracy-ko pe·aniba ong·enga,” ine Shira parakataha.
A·songo ‘pu·onani bilan’ bilakbatsranggipa bil ong·a aro ia bilchisa Rakesh Sangma-ko uni constituency-ni manderang dilgipa ong·na gita seokaha ineba UDP-ni MDC parakataha.
A·chikrangni dakbewal rikbewalko ja·rikgipa mande ong·ja ine Rakesh Sangma-ko dingtang dingtang dolrangni jegalenggipani bidingo janapatengon, iako kacharionasa ra·ange dakgrikna nanga indiba GHADC-o iandake jingjengataniara salantian lakni lak gita noksan ong·anikosa ra·baani gita ong·enga ine Shira parakataha.
“GHADC-ko kam ka·na on·jaenganichi an·ching Garo Hills-o namroro silroroanikosa champengani gita ong·enga, uni gimin Garo Hills gimikni namgninan GHADC-ko kam ka·na on·pilchina anga jingjengatenggipa dolrangko mol·molenga,” ine Shira parakataha.
