TURA: Budbar salo, Meghalaya a·dokni ning·o donggipa 43 Battalion BSF dolni gita Civic Action Program-ko South Garo Hills a·jani Panda songo ong·atangaha.
Ia program-ko ong·atanio 43 Bn BSF-ni Commandant Ratikant Thakur, mongsonggipa sokgipa ong·e bakko ra·angaha aro ia program-o songni manderangna gama ge·anio jakkalgipa bosturangko BSF dolni gita suale on·angjolaha.
A·songni sima ariko chel·chakanio jolo songdongenggipa manderang baksa nangrime dongna aro songni nokni manderangna pilak nanga dakchakanirangko on·na gita BSF dol, iandakgipa program-rangko dingtang dingtang biaprango ong·atenga ine ia tom·anio 43 Bn BSF-ni Commandant parakataha.
Iandakgipa program-ko ong·ate pilak nanga dakchakanirangko on·engani gimin songni manderangba BSF dolko mittelpilangaha.
