TURA: West Khasi Hills a·jani Nengchigen songo niam gri koela bikotenga ine badi ka·ako man·ani ja·man, iani bidingo am·sandie report-ko on·china Meghalaya High Court ge·etaniko on·ahani gimin Bristibar salo, South Garo Hills a·jani Deputy Commissioner FM Dopth-ba songni manderango sing·sandie ra·na gita ia songona re·angaha.
Songni mande saksa Alnet G Marak minggipa mandeni dilanichi adita sak manderang, Nengchigen songoniko niam gri koela bikotenga ine badi ka·ahaoba police-rang maming ja·kurangko de·jaenga ine songni manderang matnangtokengachim.
Iani bidingo songni nokma an·tangan mande saksniko, chong·motan Alnet Marak, Clington Marak, Pandit Momin, Toban Marak, Nazim Ali, Lipson Momin aro Pangseng Sangma-ko biming minge police-rangna FIR ka·doangahachim.
Ia manderang, silchidare ra·bitgipa manderangni dakchakanichi songni manderangko ka·mikkenate, koelarangko bikotenga ineba songni nokma, police-rangna badi ka·doangahachim.
Nokmani badi ka·gipani bidingo songbadrango seatani ja·man, ia songona re·ange am·sandianirangko dakchina aro antisani gisepon report-ko on·china High Court, a·dokni Chief Secretary-na aro Director General of Police (DGP)-na ge·etaniko on·angaha.
Uandaken Chief Secretary-ni ge·etaniko man·enba, South Garo Hills a·jani Deputy Commissioner, Bristibar salo, Nengchigen songona re·ange songni manderango sing·sandieaha indiba da·o dipet uni report-ko jinmana parakskakujaenga.
Indake ong·engon, kobor on·ani gitade, High Court-ni ge·etaniko man·ahani gimin West Khasi Hills a·jao donggipa Shallang-ni SDPO-ba Sukrobar salo, ia songona re·ange am·sandianirangko dakna sienga.
Antisani ja·mano High Court, ia obostani bidingo hearing-ko daktaina siengani gimin report-ko antisani gisepon on·china sorkariko ge·etahachim.