SHILLONG: Ra·galako man·gipa sakbonga MLA-rang Congress doltango donggenchimoba ba gipin dolrangchi katgenchimoba, re·baenggipa 2023 bilsini Assembly election-o maming neng·nikanirang dongjana gita block-rango pilak membor-rangkon tarie dongchina gita Congress dolni working president PN Syiem didiataha.
“Ra·galako man·gipa sakbonga MLA-rang gipin dolrango napangnaba gnang ba napangjanaba gnang indiba election-o an·ching chena man·na gita je candidate-ba party-ni tikitna dorgasto galna man·na gita block level-o tarie dongna nangenga,” ine Syiem aganaha.
Congress dolo membor ong·aoniko dontongata man·gipa sakbonga MLA-rang, 2023 bilsini Assembly election-o gipin dolrango napskae susana miksongenga ine chinrangko nikna man·enggipani gimin sing·anina Syiem ia kattarangko aganaha.
Party-ni gita uamang block-ni gadangosa ka·dongbatna nanga ine janapatengon, “MLA-rang aro MDC-rangde party ong·ja maina batanggimin changrangko niatgenchimode election changantian uamang chena ka·donggenchimoba 50 percent-de chepiltaina man·rongja,” ine Congress dolni working president parakatenba, iani giminsa uamang MLA aro MDC-rango bang·e ka·dongchakrongja ine talataniko on·angaha.
Block-ni gadangon party bilakgenchimode je candidate-ba tikitna dorgasto gale doltangko cheatna man·aigen ineba Syiem aganaha.
Koborrangko on·ani gitade, Congress doloni ra·galako man·gipa sakbonga MLA-rangoni, PT Sawkmie aro Mayralborn Syiem-de United Democratic Party (UDP)-o napna miksonganirang donga aro Ampareen Lyngdoh baksana Kimfa Marbaniang-ba National People’s Party (NPP)-o napskana miksonganirang dongenga. Mohendro Rapsang-de Congress dolon ong·angskakunaba gnang.