SHILLONG: Bristibar saloni Sukrobar salona konta 24-ni gisepo Meghalaya a·dok gimiko sak 26 manderang COVID-19 man·daptaiaha aro ia apsan salon a·doko mande sakgni COVID man·e siangdapskaaha.
Konta 24-ni gisepo COVID-19 man·dapgipa sak 26 manderangko channe da·o Meghalaya a·dok gimiko COVID-19 man·e dongenggiparang sak 211 gapaha aro ia apsan salon mande sakgni COVID-19 man·e siangdaptaiahani gimin a·dok gimiko COVID man·e sianggiparangara gimik sak 1575 gapskaengaha.
Konta 24-ni gisepo COVID man·gipa sak 26 manderangoni, sak 1-de East Jaintia Hills-o, sak 11-de East Khasi Hills-o, sak 3-de North Garo Hills-o, sak 2-de Ri Bhoi a·jao, sak 2-de South West Khasi Hills-o, sak 2-de West Garo Hills-o, sak 4-de West Jaintia Hills-o aro sak 1-de West Khasi Hills a·jao ong·a.
Salsani gisepo COVID man·e sianggipa mande sakgnioni saksade East Jaintia Hills-o aro saksade East Khasi Hills a·jao ong·a.
Ia apsan salon gimik sak 34 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 91,627 gapskaengaha.
