SHILLONG: All India Congress Committee (AICC) aro Meghalaya Pradesh Congress Committee (MPCC)-ni dilgiparang baksa agangrikchenggija NPP-chi dilenggipa MDA sorkario bakrimegipa sakbonga MLA-rang, show cause notice-na aganchakaniko on·kujaenga.
Congress dolni dilgiparang baksa agangrikchenggija MDA sorkario bakrimaniko on·ahani gimin ia sakbonga MLA-rangna Congress dolni gita show cause notice-ko on·enba aganchakaniko on·china u·iatahachim.
Indake ong·genchimoba, ia sakbonga MLA-rang, an·tangtangko bilake rakkina gitasa cholrangko sandienga aro Congress dolni show cause notice-na aganchakaniko on·janaba gnang ine kobor on·timgiparang parakataha.
Kobor on·timgiparangni u·iatani gitade, ia sakbonga Congress MLA-rang, sorkarini kamrango bakrimaniko on·na gitasa re·baahani gimin uamang Congress dolni kosako maming ong·gijako dakani dongja ine a·kangskaengachim.
Uamang Congress dolko wate katkujaengoba maini gimin show cause notice-ko on·na nangaha ineba sakbonga MLA-rang sing·doangaha.
Ia sakbonga MLA-rangna show cause notice-ko on·ani bidingo MPCC-ni dilgiparang maming resolution-ko ra·a dongjahaoba show cause notice-ko on·na tik ka·aniara sikkele ra·ani gitasa ong·aha ineba kobor on·timgiparang parakataha.
“Ia sakbonga MLA-rangna show cause notice-ko on·china sawa ge·etaha darangba ma·sikujaenga,” ine kobor on·timgiparang aganaha.
Ia sakbonga Congress MLA-rangna re·anggipa February 14 tarikon show cause notice-ko on·e sal 10-ni gisepon aganchakaniko on·china ge·etahachim ine nikna man·a.
Iani bidingo sing·sandiaton, ia show cause notice-na aganchakaniko on·ama on·jawa ua chanchiengkua ine Congress Legislature Party (CLP)-ni dilgipa Ampareen Lyngdoh parakataha.
“March jani 4 tariko a·bachengenggipa Assembly budget session-nasa anga da·o tarie dongenga aro session matchotani ja·manosa anga show cause notice-ni gimin chanchina somoi man·tainaba gnang,” ine ua aganaha.
