TURA: West Khasi Hills a·jani Nengchigen songo niam gri koela bikotenga ine badi ka·ako man·ani ja·man, iani bidingo am·sandie report-ko on·china Meghalaya High Court ge·etaniko on·ahani gimin Sonibar salo, a·dokni Inspector General of Police (IGP- Law & Order) Mukesh Singh-ba songni manderango sing·sandie ra·na gita ia songona re·angaha.
Songni mande saksa Alnet G Marak minggipa mandeni dilanichi adita sak manderang, Nengchigen songoniko niam gri koela bikotenga ine badi ka·ahaoba police-rang maming ja·kurangko de·jaenga ine songni manderang matnangtokengachim.
Iani bidingo songni nokma an·tangan mande saksniko, chong·motan Alnet Marak, Clington Marak, Pandit Momin, Toban Marak, Nazim Ali, Lipson Momin aro Pangseng Sangma-ko biming minge police-rangna FIR ka·doangahachim.
Ia manderang, silchidare ra·bitgipa manderangni dakchakanichi songni manderangko ka·mikkenate, koelarangko bikotenga ineba songni nokma, police-rangna badi ka·doangahachim.
Nokmani badi ka·gipani bidingo songbadrango seatani ja·man, ia songona re·ange am·sandianirangko dakchina aro antisani gisepon report-ko on·china High Court, a·dokni Chief Secretary-na aro Director General of Police (DGP)-na ge·etaniko on·angaha.
Uandaken Chief Secretary-ni ge·etaniko man·enba, South Garo Hills a·jani Deputy Commissioner FM Dopth-ba, Bristibar salo, Nengchigen songona re·ange songni manderango sing·sandieahachim.
Ia songo ong·enggipa obostarangko ma·sie ra·na gita Sonibar salo, IGP Mukesh Singh baksana West Khasi Hills a·jani Superintendent of Police (SP) R Lyngdoh aro Riangdoh-ni SDPO-ba Nengchigre songona re·angaha.
Ia obostani bidingo Meghalaya High Court, March-ni 2 tariko hearing-ko daktaina siengani gimin report-ko ia salni gisepon on·china sorkariko ge·etahachim.
Koborko on·ani gitade, Nengchigen songona re·angani somoio South Garo Hills a·jani DC-ba niam gri koela bikotenggipa biaprangko nieaha aro mitam koela a·kolrangkode an·tangan napeba niangaha.
Iani bidingo South Garo Hills a·jani DC, bakan a·dokni Chief Secretary RV Suchiang-na report-k on·gnok ine kobor on·aha.
Indake ong·engon, badi ka·a man·gipa manderangoni saksakoba da·onan police-rang rim·kujaengani gimin songni manderang, kenchipchipe dongna nangtokenga ine u·iataha.
