Rakesh Sangma-ni kam watani ja·man hajal kotok manderang chee re·joma

TURA: Garo Hills Autonomous District Council (GHADC)-ni chief executive membor (CEM)-ni kamko watpilchina Garo Hills gimik dabitokani ja·man, Sombar salo Babelapara-ni MDC Rakesh Sangma, an·tangni kam wataniko jinmana parakataha aro uni kam wataniko parakatani ja·man dingtang dingtang dolrangni dilanichi Garo Hills gimikoni tom·chimongbagipa hajal kotok manderang, Tura jillani rama gita inchroe re·jomangaha.
Rakesh Sangma, CEM-ni kamko wataha ine Robibar salon koborko on·ahaoba NGO-rangna maming seachi u·iata dongkujani gimin Sombar saloba GHADC office mikkangon jinma tom·e jegalanirangko dakna manchisoahachim indiba Rakesh-ni kam watani koborko name man·ani ja·mano, dingtang dingtang dolrangni dilanichi Garo Hills gimikoni tom·chimongbagipa manderang, Te·teng A·ja kal·chakramo tom·skae, ia biaponi jinma re·jomaniko a·bachengataha.
Ia jinma tom·bimonge re·jomaniko GSU, FKJGP, ADE, AYWO, FAF, AHAM aro uandakgipa dingtang dingtang dolrangni dilanichi ong·atangaha.
Re·jomaniko Te·teng A·ja kal·chakramoni a·bachenge, Hawakhana, Babupara, Tura Bazar aro Hawakhana gita re·jombapile apsan biapon matchotataha.
Ia jinma re·jomaniko a·bachengatna skang, dingtang dingtang dolni dilgiparang, jinmana aganprakengon, ia jegalanio bakrimaniko on·e iako chu·sokgipa ong·atahani gimin Garo Hills gimikni manderangkon mittelpilangaha.
Rakesh Sangma-ko GHADC-ni CEM songa intalan Garo Hills-ni dingtang dingtang dolrang, Garo Hills gimikon uko ra·galpilchina dabie jingjengatanirangko dakahachim aro GHADC office-koba antigittammang ong·pile kam ka·na on·gija jingjengatahachim ine nikna man·a.
Rakesh Sangma-ko ra·galchina dabianio maming so·sojengjeng ong·anirang dongjahani giminba dingtang dingtang NGO-ni dilgiparang, jingjengatanirango bak ra·gipa mande sakantikon mittelpilangaha.
Hajal kotok manderangni re·jomengmiting somoio Tura jillani bang·bata biaprangon aro mongsongbate Tura Bazar, Hawakhana aro uandakgipa biaprango dokkan dakgipa manderang, so·sojengjeng ong·na kenchakenba dokkanrangko chiptokaha.
Rakesh Sangma-ni CEM ong·aoniko watani ja·man NPP-chi dilenggipa Executive Committee-ni dilgiparang, Siju constituency-ni MDC aro GHADC-ni deputy Chairman Albinush Marak-ko gital CEM-na minge donatskaahachim.