SHILLONG: A·doko BJP-ni bakrimgipa Meghalaya Democratic Alliance (MDA) sorkarina chakpaaniko on·ani gimin, party-oniko ra·gala man·gipa sakbonga Congress MLA-rang, uamangna show cause on·gipani bidingo mamingkoba aganchakjani gimin uamangni kosako Congress, uamangni party high command-ona see u·iatgen.
Sakbonga MLA-rangna re·anggipa February 24 tariko salchikkingna somoi on·gipa matchotangaha, indakoba uamang uamangna show cause on·gipani bidingo da·alona kingking mamingkoba aganchakkuja ine Meghalaya PCC chief Vincent H Pala aganaha.
Party-ni kosako re·badeani gimin aroba BJP-ni bakrimgipa MDA sorkarina chakpaaniko on·ani gimin AICC, sakbonga Congress MLA-rangna re·anggipa February 14 tariko show cause notice-ko on·ahachim.
“Iani bidingo chanchirimna gita chinga March 4 tariko tom·gen aro uagitan chanchigiminrangko seenba AICC-na u·iatgen,” Pala aganaha.
Mikkangchi uamangni kosako maiko ja·ku de·gen, uni gimin AICC chanchigen, ua aganaha.
Sakbonga Congress MLA-rangko party-oniko ra·galani ja·mano, CLP dilgipa Ampareen Lyngdoh indake aganahachim je sakbonga MLA-rang jekoba apsan chanchie ja·ku de·gen.
Koboro indakeba paraka je ra·galako man·gipa sakbonga MLA-rang, show cause-na aganchakjana gita ku·mongaha, jemangan gipin political party-rangoni seoktaianiko am·skana gita uamangni gisiko chanchitokaha. Unomitingo MLA sakbongaoni sakbrinade sason ka·enggipa sorkario kamrangkoba tikatpil·ahachim ine nikatna man·a.
P T Sawkmie aro Mohendro Rapsang mangko Meghalaya New aro Renewable Energy Development Agency-o co-chairman-rang dake donaha aro Mayralborn Syiem-ko Meghalaya Industrial Development Corporation-ni co-chairman dake donaha, unomitingo Kimfa Marbaniang-ko, Meghalaya Government Construction Company-ni co-chairman dake donataha ine re·anggipa antio notice on·gipaoniko nikrikna man·a.
Re·anggipa Assembly election-o Congress, ge 60 Assembly seat-rangoniko ge 12-kosan man·rikaha, uamangoni saksnide gitcham chief minister Mukul Sangma baksa party-oni ong·katenba da·rikkari November jao Trinamool Congress baksa bakrimeaha.
