TURA: West Khasi Hills a·jani Nengchigin songo niam gri koelarangko badingenga ine adita salrangna skang, an·tangko songni nokma ine a·kange police-rangna badi ka·doanggipa Kristina Marak-ni kosako Nengchigin songni Nokma Sandil G Marak, FIR ka·doangskaaha.
Sandil G Marak-ni kobor setimgiparangna seachi parakatani gitade, ua Nengchigin Gare Hawepal Mahari gimikni seokako man·e aro skango Nengchigin a·kingko man·badilchenge Nokma ong·e sianggipa ambitang Denje G Marak aro atchutang Rahen R Sangma-ni su·gipa ong·an baksana, Nokmani ja·chong da·o Nongstoin Syiemship ba Rajani ra·chakaniko man·e uasa Nokma ong·paengachim.
“Indake ong·genchimoba, re·anggipa February-ni 18 tariko Nengchigin songoni saksa Kristina G Marak, an·tangko nokma ine a·kange songbadrango aro social media-rango jangbingbangatahachim. Uni iandake a·kanganiara kakket ong·ja maina angasa Nongstoin Rajani ra·chakako man·gimin asol nokma ong·a,” ine Nokma Sandil Marak parakataha.
Sandil Marak-ni parakatani gitade, Kristina Marak-ni dol adita bilsirangna skangonin ia a·kingna, Nokmana aro agent-ko ra·sekna gita tol·e badi ka·bingbangengachim indiba da·ona kingkingba kachario dakgrikanio amrikjahachim.
“Adita salrangna skangsan Kristina Marak, angni adatang saksniko niam gri koela bikotenga ine badi ka·aha aro uamangoni saksade Rajani ra·chakako man·e Agent ong·enggipa angni adatang Arneth G Marak ong·a. Angni adatang saksnini kosako iandake matnangani aro badi ka·aniara kakket ong·ja maina a·kingna dakgrikmitingo court-ni injuction order on·gimin dongani gimin darangba niamko pe·e koelarangko bikotna man·ja,” ine Nengchigin songni Nokma talataniko on·angaha.
Nengchigin songoniko koela salgipa gari bolprakonikon police baksa melie gong 500/- ka·e gilenga ine matnanganiko jegalatskaengon, da·o dipet gital dake koela bikota dongjaenga ong·ode bani koelako salgen aro koela sala dongjaenga ong·ode bani garioniko gong 500/- ka·e gilgen ine Sandil Marak sing·doangaha.
Silchidare ra·bitgipa manderang baksa melie songni manderangko ka·mikkenatenga ine matnanganikoba songni nokma raken jegalataha aro da·o dipet ia songrango silchidare ra·bite re·ruraenggipa manderang dongja ine parakataha.
“Uni gimin Kristina Marak-ni an·tangko nokma ine a·kange angni adatangrangni kosako matnanganiara tol·e matnanganisan ong·aia aro darangba ia kattarangko bebera·pajachina,” ine Nokma Sandil Marak parakataha.
