SHILLONG: Ukraine a·songo poraienggipa Meghalaya a·dokni chatro chatrirangoni sak 29-de da·o tom·tomen India a·songona sokbapilaha ine Bristibar salo, a·dokni Chief Minister Conrad K Sangma parakataha.
Chief Minister-ni social media-o parakatani gitade, Ukraine a·songo donge poraienggipa chatro chatrirangoni sak 29-de India-ona tom·tome sokbapilaha, sak 2-de Ukraine a·songoni sima ariona re·baenga aro sak 11-de Ukraine a·songni samba jolo donggipa gipin a·songrangona sokangaha.
Ia chatro chatrirangkoba bakan India a·songona rimbapilgnok ineba Chief Minister parakataha.
Ukraine a·songo jachange dongna nangenggipa a·songni chatro chatrirangko rimbapilna rakbee kamrangko ka·engani gimin ua, Prime Minister’s Office (PMO) aro External Affairs Ministry-koba mittelpilangaha.
Koborko on·ani gitade, Ukraine a·songo jachange dongenggipa India a·songni manderangko rimongkatbana gita Hungary, Poland, Slovac Republic aro Romania a·songni MEA dolrang, Ukraine a·songni simarango donggipa dingtang dingtang biaprango donge kamrangko ka·engachim.
“Ukraine a·songo jachange dongkuenggipa a·dokni manderangko biaptangtangona sokatbana gita anga Union Home Secretary aro External Affairs Minister baksa agangrikjringenga. Meghalaya a·dokni pilak chatro chatrirangkon tom·tome rimbapilna man·na gita anga Ukraine a·songni samba jolo donggipa a·songrango dongchina ge·etako man·gipa sakbri Union Minister-rang baksaba agangrikaha,” ine Chief Minister parakataha.
