SHILLONG: Sukrobar salo, Meghalaya Legislative Assembly-ni Budget Session-ko a·bachengatangaha aro ia session-ko a·bachengatanio a·dokni Governor Satya Pal Malik, Assembly-na aganprakengon, Shillong songjinmani badiaba badiaba biaprango IED boma gopretanirangko nikna man·ahaoba a·dok gimikon tom·tomaniko nikna man·batenga ine parakangaha.
HNLC bobil dolni sorkari baksa agangrikna skaniko parakaniara a·doko pangkamgipa tom·tomaniko ra·bana chol on·ani gita ong·engaha ineba ua aganaha.
HNLC bobil dolni tom·tomaona re·bapilna nangnike agangrikna parakaniko sorkari namnike ra·chakaha aro bobil dol baksa agangrikaniko a·bachengatahaon, ia kamko chu·sokgipa ong·atna kam ka·gen ineba Governor aganaha.
Indian Constitution-ni dongimin niamon sorkari baksa agangrikna gita HNLC bobil dol, a·dok sorkarina seatahachim ine nikna man·a.
Shillong songjinmani dingtang dingtang biaprango IED bomarangko gopretanio ta·raken kamrangko ka·enba, dos dakgipa manderangko rim·na man·ahani gimin ua dingtangmancha Meghalaya Police-koba mittelpilangaha.
Assam aro Meghalaya a·dok damgnini simarango meligrikna man·jaenggipa biaprango tom·tomaniko ra·bapilna a·dok sorkarini ja·ku de·aniko gisik ra·atpilangengon, ia a·dok damgnini simarango songdongenggipa manderangna tom·tomaniko aro namroro silroroaniko ra·bana gita a·dok sorkari, ia ja·kuko de·enga ine a·dokni Governor parakataha.
“A·dok damgnini simarango meligrikgijanirangko bon·atsrangna aro jolo songdongenggipa manderangna tom·tomaniko ra·bapilna gita batanggimin jadokni gisepo a·dok damgnini chief minister-rang, baditaba chang apsan tom·e chanchirimaha aro meligrikna man·jaenggipa dam 12 biaprangoni, damdok jolrangko, chong·motan Tarabari, Gizang, Hahim, Boklapara, Khanapara-Pillangkata aro Ratacherra jolrangko skanggipa bako namatchengna tik ka·aha. Cabinet minister-rangni dilanichi songako man·gipa regional committee-rang, ia damdok jolrangni bidingo ma·sie ra·na gita dingtang dingtang biaprangona re·ange songni nokni manderang baksa agangrikaha aro ia committe-rang, Assam-ni regional committee-rang baksaba apsan chanchirimaha,” ine Governor aganaha.
Assam aro Meghalaya-ni Chief Minister-rang, re·anggipa January 20 tariko Union Home Minister-ko iani bidingo gronge agangrikaha ineba ua parakataha.
“A·dok damgnini chief minister-rang, re·anggipa January 29 tariko, Memorandum of Understanding (MoU)-o soi ka·grikaha aro iako Home Affairs Ministry-na watataha. A·dok damgnini simarango meligrikna man·jaenggipa biaprangoni damdok jolrangkode bakan namatna man·gen ine chinga ka·dongenga,” ineba Governor, Assembly-o aganprakengmiting somoio parakataha.
