Rongjeng: East Garo Hills Rongjeng-ni songdonggiparangko a·jolni NGO-rang songona ra·banasienggipa Model College-ko rika namja bidingo mijal Sonibar salo jegalna rally-ko ong·atna skang Rongjeng bakrao chanchidilchengaha.
GSU, FKJGP, ASWA, AAYF, GSMC aro apsan songni ASCOR jegalaniko dakdilaha.
Rongjeng Model College project 2019 bilsio rikchakataha aro uan gong kror 12-mang tangkana bata. Covid-ni a·selo rika matchotgni ru·utengaha. Rikaba namen namja aroba maming u·iatani gri project-ba dingtanganina a·jolni manderang ka·o nangtokaha, uamang aganaha.
Ua project ma·mongni Rashtriya Uchchatar Shiksha Abhiyan (RUSA) scheme ong·a aro uko Babelapara-ni MDC Rakesh Sangma rikaha.
“Chingni a·jolna college-ko dabianio chingni rake kam ka·ani bilsi 50 bataha ua indaken gimaiahako chinga nikkuja. Bang·en matnangako man·genchimoba aro maina college-ko indaken galchipe donenga aganchakchina mol·moloba a·dokni pilak bil gnang-giparangni knachakgijaniko ching man·e namen duk ong·a,” Rongjeng-ni MDC, Mettrinson G Momin, meeting-o aganaha.
Ua project-ko skango Mukul Sangma-ni sorkari pass ka·achim uko da·o NPP-ni dilenggipa sorkari simsakgijaniko mesokenga, ua matnangaha.
“Ua college-ko rika namjani gimin aro maming u·iatani gri dingtang dake rikani gimin chinga jegalangkuna chinga da·alo chanchiaha. Maming ra·chakako man·gija rika jatchio dingtangatna man·ama ian cha·bok-rusiani aro simsakgijani ong·a nikrikna man·a,” GSU president, Rattu Sangma aganaha. RTI aganchakako nangnikenga indiba maming kobor dongja.
“DPR-o dingtangatna u·iatani dongama chinga sing·aha dongja, ia obostao ra·chakako man·gija sawa nok rikako chu·gimik dingatna DPR-ko on·aha talatchina sing·aha indiba aganchakako man·jaha,” ASWA-ni secretary, Tuesbrial Marak aganaha.
NGO-rang skango education minister, Lahkmen Rymbui-ko grongna Shilongona re·angaha indiba minister uamangko grongna attam 7-ko on·aha uamang suk ong·jaha.
“Chingkon grongon project-rangko bang·akon dingtangataha ine ua aganaha indiba maiba dingtangataha uko aganchakjaha,” Rickchy Sangma aganaha.
Uamangni dabiako knachakjaskal March 9-o jegalangkuna NGO-rang aganaha.
Rally-o jegalgiparang CM, Conrad Sangmam education minister, Rymbui-ko aro local MLA Jim Sangma-ni kosako jegalangaha.