SHILLONG: A·ongni gipin gipin a·dokrang gitan Meghalayaba, dakgrik dinggrikani ong·enggipa Ukraine a·songo jachange dongenggipa Meghalayani chatro chatrirangko naljoke rimongkatbaani bidingo bakrime kamrangko ka·enga.
Gital koborko man·soani gita, Meghalayani bang·bata chatro chatirangan a·dokona naljoke sokbatokaha aro mitamrangde da·o Ukraine-oni noktangona re·batokenga.
Gipin gipin a·dokrangni daka gita dake, Meghalaya sorkariba, SP-rangko aro DC-rangko, Ukraine-o jachangenggipa chatro chtrirangni ma·a paarangko grongchina ge·etaha, unomitingo bang·bata chatro chatrirangni noktangtang jamtangtangona tom·tome sokbapilna man·anina, krime kamrangko ka·gipa District administration, Sorkari aro Ministry of External Affairs-ko mittelaha.
East Khasi Hills-ni Additional Deputy Commissioner, Malthus Sangma, jean Shillong-o iani kamrangko ka·engachim, ua agana je district administration, chatro chatrirangni ma·a paarangko grongchina gita uamangni magistrate-rangko watataha aro pilak nangarangko magistrate-rangchin see jote ra·aha.
“Uni ja·mano chatro chatrirangni gimin uamangni see jote ra·bagiminrangko, chatro chatrirangni gimin Ministry of External Affairs baksa bakrime kamrangko ka·china gita Chief Ministers Office aro PMO-ona watataha,’’ Sangma aganaha.
Ukraine-o jachanggipa chatro chtrirang Meghalayaona sokbajokon, pil·tai magistrate-rangko uamangona watattaia aro uamangni gimin rongtale ra·ani ja·mano chatro chatrirangni gimin Prime Ministers Office-o watdoattaia.
Indake chatro chatri sakantini naljoke sokbagnina chinga chingni bil ama gitan kamrangko ka·enga ineba ua aganaha.
Chief Ministers office-oniko gitalgipa koborko man·ani gita, gimik gimang sak 43 chatro chatrirangoni, Sukrobaro sokbagipa sakbri aro Delhiona sokbaenggipa sakbriko chane gimikchi 33 chatro chatrirang Indiaona sokbatokaha.
Saksade Ukrainian sima arirangona sokangaha aro sakbonga Budapest-o jemangkon ru·utgijan India-ona rimongkatbagnok ine Chief Minister, Conrad Sangma bang·gija somoirangna skango tweet ka·aha.
