TURA: Sima ari jolrango songdongenggipa manderang baksa meli-nangrime donganiko rakkiangna aro songni nokni manderangna ka·dongatanirangko on·na gita Sombar salo, 100 Battalion BSF dolni gita civic action program-ko West Garo Hills a·jani Dalu Border Outpost-o ong·atangaha.
Ia program-ko ong·atanio BSF dolni sipairang, solar system inverter, water purification RO system, computer aro kal·susaani bosturangko sima jolo donggipa dingtang dingtang songrangna sualangaha aro skulo poraienggipa bi·sarangnaba ma·manti bosturangko suale on·angaha.
Ia civic action program-ko ong·atanio Dalu, Kilapara, Chandaboi, Baburambil, Jatrakona aro uandakgipa songni manderang bakko ra·angaha aro dingtang dingtang skulni bi·sarangba dongpae, cultural program-ko ong·atanio bakko ra·angtokaha.
Ia program-ko ong·atanio dongpae bakko ra·anggipa gipin manderangara, 100 Bn BSF-ni Commandant Ajay Kumar Tiwary, BSF-ni gipin official-rang, songni nokmarang, skigiparang, chatro chatrirang aro gipinrang ong·a.
