SHILLONG: Meghalaya a·doko Jal Jeevan Mission (JJM)-ni kamrangko somoi gitan matchotatna man·gen ine Sombar salo, a·dokni PHE Minister Renikton Lyngdoh Tongkhar, an·tangni ka·dongchakenganiko parakataha.
“Meghalaya a·doko JJM-ni pilak kamrangkon da·o ka·engaha aro chinga kamrangko somoi gitan matchotatna ka·dongenga,” ine Assembly-ni Budget Session-o sing·anina Tongkhar aganchakaha.
JJM-ni kamna pilak biaprangon apsan pipe-rangko jakkalna nanga ine Rangsakona-ni AITC MLA Zenith M Sangma-ni agangipa kattarangna aganchakaniko on·angengon, a·song gimikon JJM-ni ning·o chirangko sale on·na gita Ministry-onin GI pipe aro HDPE plastic pipe-rangko jakkalchina on·aha ine PHE Minister parakatskaaha.
HDPE pipe-rangkode gong 17-san dakaia aro GI pipe-rangkode gong 200 dakskaa ine Zenith Sangma-ni talataniko on·angskaon, GI pipe-rangde bilsi 15-mangsan baiskaaia indiba HDPE pipe-rangde bilsi 50-mang baigipa ong·skaa ine Tongkhar talataniko on·angskaaha.
Contractor-rangni bill-rangko gamanio 6-7 percent-kode gittamgipa party-na gamna nangenga ine Rangsakona MLA-ni matnanganina aganchakaniko on·angengon, da·o dipet iani bidingo ua maming koborrangko man·soa dongkuja ine minister parakatskaaha.
Contractor-rangna uamangni kamrango pangchake certificate-rangko on·ani ja·mansa bill-rangko gamenga ineba PHE Minister talataniko on·angaha.
North Garo Hills a·jao dam 531 songrangna baten JJM-ni ning·o man·gopchina proposal-ko on·aha aro da·o dipet 28.43 percent-ni gita kamrangko ka·engaha ineba iana skang PHE Minister talataniko on·angaha.
Contractor saksanan ming 6-7 project-rangko on·engani a·sel contractor-rang kamrangko somoi gita matchotna man·jaenga ine matnanganirangko knasona man·enga ine Mendipathar-ni AITC MLA Marthon Sangma-ba parakataha.