SHILLONG: Mongolbar pringo, South West Khasi Hills a·jani Nonglang songo donggipa nok te·sako wa·al kamgopaha.
Koborko on·ani gitade, ia Nonglang songara Mawkyrwat-oni km 2-mang chel·ao dongachim aro wa·al kamgipa nokara ramram rikgipa noksa ong·e bon·pile kamgopako man·aha.
Wa·al kamanio darangba saknaanirangko man·jaha aro ia nokara bosturangko donchakgipa noksa ong·e ua somoio darangba noko dongjachim ine kobor on·aha.
Kobor man·soa bakan ia biapona wa·al kimitgipa garirang re·ange wa·alko kimitna jotton ka·aha indiba ja·manchakahani gimin wa·alko kimitsrapjae nokko bon·pile kamgopaha.
Indake ong·engon, ia nokni sambao donggipa buringo saoba wa·al so·ani a·selsa ia bolchi rikgipa nokko wa·al kamchapaha ine official-rang chanchichipenga.
