SHILLONG: SSA skulrango skigiparangni man·na nangkuenggipa dormaharangko on·jaengani gimin Bristibar salo, Opposition MLA-rang, a·dok sorkariko matnangatenba, skigiparangni neng·nikanirangko ta·raken namatchina didiangtokaha.
Assemly-o skigiparangni gimin jera ra·grikanio bakko ra·angengon, SSA skigiparangnaba simsak nirokanirangko aro mande ra·aniko on·na nangchongmota ine Mawsynram-ni MLA HM Shangpliang, a·dok sorkariko didiangaha.
Shangpliang-ni parakatani gitade, SSA-ni ning·o donggipa sak 5814 LP skulni skigiparang aro sak 6727 UP skulni skigiparang, batanggimin somoirangonin an·tangtangni neng·nikanirangko sorkarina u·iatengachim indiba sorkari, skigiparangni neng·nikanirangko namatna man·kujaengachim.
A·dokni sak 12,541 SSA skigiparangko, RTE aro SSA-ni niamrango pangchake state implementation society-oniko state education department-ona apjitangchina nangniktokengachim ine janapatengon, Meghalaya Right of Children to Free & Compulsory Education Rules 2011-ni ning·o SSA skigiparangba regular skigiparang gitan, pay scale aro allowance-rang, sanna banani cholrang, PF aro gipin man·anirangko man·pana nangachim ine AITC MLA parakataha.
SSA skulrango skigiparang medical leave-rangkoba man·ja aro maternity leave-oba sorkarioniko maming dakchakanirangko man·ja ine janapatengon, LP skulo skigiparang japrako tik ka·gimin gong 19,044-kosan aro UP skulrango skigiparangba japrako gong 20,493-kosan man·paenga ine Shangpliang, an·tangni suk ong·gijaniko parakataha.
SSA skigiparangna miksonge chamatgipa tangka paisarangko watjaenga ine Finance department-ko matnangatengon, department-ni simsakjaengani a·selan skigiparang ramarango re·jome jingjengatanirangko daktokna nangenga ine Shangpliang parakataha.
Ia jera ra·grikanio MLA PT Sawkmie-ba bak ra·angengon, skigiparang an·tangtangni man·na nangkuenggipa dormaharangko on·china dabitokengoba da·onan skigiparangni dabianiko sorkari knachakjaenga ine an·tangni suk ong·gijaniko parakataha.
Nongthymmai-ni MLA Charles Pyngrope-ba skigiparangna dormaharangko somoi gita on·jaengani gimin an·tangni suk ong·gijaniko parakatengon, skigiparangna indita jarangni dormaharangko on·chipgija dongenchimode ja·mano so·sojengjeng ong·anirangko niknaba gnang ine mikrakataniko on·angaha.
MLA-rangni sing·anirangna aganchakaniko on·angengon, Meghalaya a·doko skulrangko chalaiani bewalara, Assam, Arunachal Pradesh ba Mizoram a·dokrang gita apsan ong·ja indiba Meghalaya sorkari, da·o gita neng·nikanirangko man·ani somoirangoba skigiparangna man·a dipetde dakchakna jotton ka·enga ine talataniko on·angaha.
Assam-o gimik dam 65,907 skulrang donga aro ianoni dam 15,396 skulrangde sak 32,496 skigiparang baksa SSA skulrang ong·a ine talataniko on·angengon, ia skulrangko Assam sorkarini Education department-chi chalaienga ine Education Minister parakataha.
“Meghalaya a·doko dam 14,694 skulrang dongskaa aro ianoni dam 5,166 skulrangde sak 12,541 skigiparang baksa SSA skulrang ong·a,” ineba ua parakataha.
Skigiparangna jasnini dormaharangko on·na gita sorkarini man·sogipa gong lak 29535.32-oni gong lak 19863.20-ko maming ja·manchakata grian joljol on·ataha aro gong lak 6762.888-kode SSA-ni gipin kamrangna jakkalaha ineba ua parakataha.
“Meghalaya a·doko skigiparangnaq jasani dormahako on·nan gong lak 2900-mangkode nangenga, da·o bangki dongkuenggipa gong lak 2913.225-oni gong lak 1267.257-de Recurring aro gong lak 1645.97-de non-recurring ong·ani gimin skigiparangna jasani dormahakon on·na chu·ongjaenga,” ineba Rymbui aganaha.
Indake ong·engon, SSA skulrango skigiparangna da·o jagnini dormaharangko on·na gita sorkari rakbee kamrangko ka·engaha aro gnigipa instalment-ko ma·mong sorkari watatahaon, bangki dormaharangkoba on·gnok ine Education Minister parakataha.