SHILLONG: Meghalaya aro Assam a·dokni simarango golmal ong·enggipa biaprangko namatna gita ja·ku de·anio West Khasi Hills a·jani ning·o donggipa Malchapara aro Salbari A·chik songrangkoba Assam-o napatna tik ka·ahani gimin ia songgnini manderang, sorkarini kamo suk ong·gijaniko parakattokaha.
Malchapara aro Salbari songrango songdongenggipa manderangni parakatani gitade, a·bachengonin uamang Meghalaya a·dok ning·o dongpana sikaniko sorkarina u·iatahachim indiba da·o ia biaprangko sualanio ia songgnikode Assam-o napatna gita Assam aro Meghalaya a·dok damgnini sorkarirang tik ka·skaaha.
“West Khasi Hills regional committee-ni report-ko Chief Minister-na on·na skangan chinga committee-ni chairman-na chittiko see, ia songrangkoba Meghalaya a·dokon napatchina mol·molahachim indiba sorkari, chingni mol·molaniko knachakjaha. Malchapara aro Salbari songni manderang Meghalaya a·dokon ong·pana nangnikengoba, ia songgnikon Assam-o napatgen ine Meghalaya a·dokni Chief Minister Conrad Sangma, Assembly-o parakatskaaha,” ine Malachapara songni saksa Jewash Sangma parakataha.
Jewash Sangma-ni parakatani gitade, Malchapara songo ge 104 nokdangrang donga aro ia nokdangrang pilakan A·chikrang ong·achim.
“Chingni songko Assam-o napataniko chinga nangnikjaengachim indiba sorkari chingni mol·molaniko knachakjahani gimin chinga namen suk ong·jaha. Chingaba Meghalaya a·dok ning·o ga·akgipa songan ong·a ine chingo sakkirangba dongachim,” ine Jewash parakatenba, Malchapara aro Salbari songrangna agrede samba jolo donggipa pilak songrangkon Meghalaya-o napatskaenga ine talataniko on·angaha.
Ia songgnikoba Meghalaya a·dokon donchina mol·molatengon, uamangni mol·molaniko knachakgija sorkari, ia songrangko Assam-o napdraatode uamang jekoba dakna man·aigen ine songni manderang mikrakataniko on·angaha.
Apsan daken, Salbari songni Nokma Kraibin Sangma-ba uni songko Assam-o napatengani gimin suk ong·gijaniko parakataha.
Salbari songko Meghalaya a·dokon donchina gita uamang a·bachengon, Union Minister Amit Shah aro committee-ni chairman Tongkhar-na seachi u·iatmanahachim ineba Nokma aganaha.
