SHILLONG: Meghalaya a·dokni dingtang dingtang biaprango kuligipa petrol pump-rangoniko tangka ra·seke katgipa sakbonga manderangko Meghalaya police Sonibaro rim·aha aro denggu dakgiparangko rim·na sandianio chu·sokgipa ong·aha.
Indake rong 14 gulirang donggipa bolsa AK-47 rifle, degal bolgni, ge·gittam mobile handset, Assamni registration gnanggipa AS 27 D 2482 bolsa motor cycle aro dingtang dingtang bosturangkoba uamangoniko man·aha ine saksa police official aganaha.
Sriksrik u·iatgipa koborrangko man·soani ja·mano am·sandianiko dakenba dosi dakgipa sakbri Jotish Daimary, Sansoma Mooshahary, Shankar Boro aro Bipul Basumatry mangko uamangni dongnue chakenggipa East Jaintia Hills-ni Umlawang song sepangogipa Ryngsong Shylla-oniko rim·eaha ine East Jaintia Hills-ni district police chief Jagpal Singh Dhanoa aganaha.
Unomitingo dosi dakgiparangoni bongagipa Fajal Haque-ko Guwahati-ni Basistha joloniko Assam police-ni dakchakachi rim·eaha ineba SP aganaha.
Rim·a man·giparang gimikan, re·anggipa somoio, East Jaintia Hills Khliehriat, Shillong aro Byrnihat-ni petrol pump-rangoniko tangka ra·seke ra·anirangko ku·rachakaha ine Dhaonoa aganaha. Jaitush, jean Assam-ni Udalguri district-ni Mazkhuti songoni ong·a, uan ia namgijagipa kamko ka·dilgipa ong·achim.
Pilak a·selrangko namedake ma·sitokna man·na gita rim·a man·gipa manderangko namedake sing·sandianirangko dakenga ineba Dhaonoa aganaha.
