SHILLONG: Tangka paisani gita neng·nikanirangko chagrongna nangengani gimin a·doko donggipa adhoc skulrangko deficit-ni gadangona ra·dochina gita Federation of All School Teachers of Meghalaya (FASTOM)-ni dabianiko Budbar salo a·dokni Education department jegalataha indiba skigiparangni dormaharangko bariatskana gita ku·rachakaniko on·angaha.
FASTOM-ni president Kenneth Shadap-ni parakatani gitade, tangka paisani gita neng·nikanirangko chagrongna nangengani gimin da·o dipet adhoc skulrangko deficit-ni gadangona ra·dona man·kujawa indiba adhoc skulrango skigiparangni dormahako gong 18,000/-ona bariatskana gita State Education Secretary Ambrose Ch Marak ku·rachakataha.
“Adhoc skulrangko da·o dipet deficit-ona ra·dona man·kujawa ine Education Secretary parakatenba, skigiparangni dormahako gong 18,000/-ona bariatskana ku·rachakataha,” ine FASTOM-ni president aganaha.
Shadap-ni parakatani gitade, Adhoc skulrango skigiparangni dormahako, higher secondary-ni skigiparang, secondary level-ni science skigiparang, upper primary aro lower primary-ni dakchakgipa skigiparang aro Hindi skigiparang pilaknan apsan bariatchina uamang dabienga.
“Education official-ni chingna talatani gitade, adhoc skulrango skigiparangna dormahako on·anio bilsio gong kror 145-mang ong·enga aro chingni dormaha bariatchina bi·aniko chu·sokatgenchimode japrakon gong kror 13-mangko nangdapgen aro uandaken skigiparangni dormahako on·anio japrako gong kror 156-mang gapeskagen,” ine Shadap aganaha.
Indake ong·engon, adhoc skulrango skigiparangna bilsio 5 percent ka·e dormahako bariatchina aro skulni headmaster, headmistress aro principal-rangba somoi bate kam ka·na nangengani gimin dormaharangko bariatchina gita FASTOM-ni president, a·dok sorkariko didiangaha.
