TURA: Meghalaya sorkarini ning·o chalaienggipa village employment council (VEC)-rango songni nokni Nokmarangna dal·dalgipa kamrangko on·mika dake 2014 bilsio ANVC dolrang baksa sorkarini songgigrikgiminko pe·galna jotton ka·enga ine Bristibar salo, Tura-ni MDC Bernard N Marak matnangataha.
“Songni Nokmarangko niam gri VEC-rango bak ong·ate aro VEC-rangko Rural Local Body ba songko nokko dilgipa bimang gita ra·chakchina ma·mong sorkario dabie a·dok sorkari, ANVC dolrang baksa songgigrikaniko mande ra·jaenga. Ian a·dok sorkarini Nokmarangko togina jotton ka·anisa ong·enga,” ine Marak parakataha.
Tura MDC-ni parakatani gitade, ritchani ritcha Nokmarangko maming koros nanga gri aro gong 2000/- tangkako on·e a·dokni proposal-ko ra·chakchina gita a·dok sorkari okamataha indiba iako dakanichi Nokmarangde bang·gija tangka paisarangkosan man·paaigen aro ian a·dok sorkarinasa man·dapani ong·aigenchim.
“VEC-rangde jatni bimang ong·jani gimin VEC-rangko Rural Local Body dake ra·gatahaode Nokmarangna on·gimin bil aro daitorangde pe·galako man·skagnok, uni gimin iako raken champengna nangenga,” ine Marak talataniko on·angenba, Nokmarangko VEC-ni chairman songgenchimode ian jatni dakbewal rikbewal baksa namen dingtanggrikani ong·skagnok ine parakataha.
DRDA-de April 1 tarik dipet kam ka·jawaha ine sorkarini u·iatgipani bidingo janapatengon, Nokmarangko VEC-ni chairman/ex officio membor songenba VEC-rangko Rural Local Body gita recognise ka·china jotton ka·ani pal iako a·dok sorkari ra·chakna man·ode nambatgen ineba Marak parakataha.
“Meghalaya a·dokode Constitution-ni 93rd Amendment dongja ine anga namen ma·sia aro songko nokkoba jatni dilgiparangsa, songni nokni manderang baksa ku·mong nangrimao chalaienga. Nokmarangko VEC-rango man·chapatgenchimode uan jatni niam retiko pe·ani gitasa ong·gnok,” ine Tura-ni MDC parakataha.