GSU Phulbari unit-ni election-ko April 9 tariko ong·atgen

 

TURA: Garo Students Union (GSU) Phulbari regional unit-ni election-ko ong·atna gita re·anggipa 2021 bilsini November 20 tarikon election commission-ko songmanahaoba election-ko ong·atchenggija ia unit-ni gital dilgiparangko adita salrangna skang songe donanganiara GSU-ni constitution-ko pe·ani gita ong·enga ine commission-ni chief election commissioner Probash D Sangma parakatenba, ia unit-ni gital dilgiparangko niamo seokna gita election-ko re·baenggipa April jani 9 tariko ong·atanggen ine u·iataha.

“Adita salrangna skang, election commission aro chatro chatrirangna maming u·iatani gri, GSU-ni mitam membor-rang, GSU Phulbari regional unit-ni gital dilgiparangko songe central executive committee-ona watataha aro ia bimingrangko GSU-CEC ra·chakangaha. Iandake niam gri songgipa unit-ni gital dilgiparangko ra·chakaniara GSU Constitution-ni Chapter 5 Article B-ni ning·o Election Commission-na on·gimin bilko pe·ani gita ong·aha. Ia unit-ni gital president aro secretary-ko seokna election commission dongani gimin CEC-ni ra·chakgipa Phulbari unit-ni dilgiparangko ra·chakna man·jawa,” ine GSU Phulbari regional unit-ni chief election commissioner parakataha.

Indake ong·engon, GSU Phulbari unit-ni election-ko ong·atna gita nomination-rangko March 21 tarikoni March 25 tarikona ra·chakanggen, nomination-rangko April-ni 2 tariko scrutiny ka·gen, pu·onaniko April-ni 9 tariko ong·atgen aro apsan salon result-ko parakatgen ineba GSU Phulbari unit-ni chief election commissioner parakataha.

Ia election-o GSU Phulbari regional unit-ni president aro secretary-ni kamna susana sikenggipa candidate-rang, skanggipa India a·songo songdongkamgipa ong·na nanggen, A·chik jatonin atchigipa ong·na nanggen, president-ni kamna komibeoba graduate aro secretary-ni kamna Class 12 pass ka·gipa ong·na nanggen, maming ong·gija dakgipa kamrango jak donggipa ong·na nangjawa, office-rango kam ka·gipa ba man·gnirang donggipa ong·na man·jawa aro komibeoba bilsignina GSU-ni membor ong·gimin ong·na nanggen ineba GSU Phulbari regional unit-ni election commission u·iataha.

Get real time updates directly on your device, subscribe now.

Comments are closed.