TURA: Indian Constitution-ni Sixth Schedule-ko taridapna miksongenggipani bidingo Garo Hills gimikni Nokmarang, an·tangtangni suk ong·gijaniko mesokna gita a·songni Prime Minister Narendra Modi-na sedoataha.
Prime Minister-na sedoatgipa chittio Nokmarangni parakatani gitade, Sixth Schedule-ko taridapna miksonganirang dongahaoba, ia Sixth Schedule-ko taridapanichi mai namgni ba mai namgijanirang sokbagenchim, uarangni giminde ma·mong aro a·dok sorkarini dilgiparangba Nokmarangna agan-talate on·a dongkujachim.
Iani bidingo GHADC-ni mitam MDC-rangsan Nokmarang baksa chanchirimdilahaoba, Nokmarangni nangnikanirangkode uamangba ma·mong sorkarina on·atgipa ku·pattianirango man·chapatjahachim ineba Nokmarang parakataha.
Garo Hills-o village council-rangko songna gita miksongenggipani bidingo janapatengon, chengonin A·chik songrangara maharirangnisa ong·a aro A·chik songrangko nokma laskarrangsa maharirangni on·gimin bilo pangchake chalaienga ine Nokmarang talataniko on·angenba, Garo Hills-o village council songaniko raken jegalattokaha.
A·chik a·songni namgnina 1958 bilsini Village Council Act-ko chu·gimik ra·galsrangchina gita Nokmarang, a·songni Prime Minister-ko didiataha.
Sixth Schedule-ko taridapanio GHADC-o sakbri membor-rangko Governor-ni jakchi songe on·na miksonganikoba Nokmarang jegalataha.
“Sixth Schedule-o ‘unrepresented tribes’ ingipa kattakon chinga ma·sina man·ja maina GHADC election-rango pilak jatrangan jakgitele susana aro bakko ra·na man·tokengachim. Skangonin GHADC-o pilak jatni manderangan MDC ong·engaha aro Sixth Schedule-o ‘unrepresented tribes’ ingipa kattako on·aniara maming ortoan dongjaenga,” ine Nokmarang parakataha.
GHADC-ni gimik dam 42 seat-rangoni damdokna nominate ka·e ia damdokoni damgnikode me·chikrangna aro dambrikode ‘unrepresented tribes’-rangna kange dongen ine tik ka·gipani gimin janapatengon, da·o dipet GHADC pilak jatrangonin susapana man·enga aro me·chikrangkoba susaanirangko champenga dongkujani gimin ian kragijani ong·enga ine nokmarang parakataha.