TURA: East Garo Hills a·jao aro mongsongbate Williamnagar jillaoba gari gorarang bang·baroroenganichi gari gorarangni re·ruraanirangko nirok sandianio police-rang neng·nikanirangko man·engahani gimin East Garo Hills a·jao donatako man·gipa gital police-rangna re·anggipa Sonibar salo, dingtangmancha traffic-ko chalaiani ba nirok sandiani bidingo skie on·anirangko dakangaha.
Kobor on·ani gitade, East Garo Hills a·jaoba gari gorarangni re·ruraanirangko nirokna gita police-rang chu·ongjaenga ine nikenba Meghalaya Police headquarter-oni dingtangmancha gital traffic police-rangko East Garo Hills a·jan on·dapataha aro uandaken ia gital traffic police-rangna, traffic-ko chalaiani bidingo East Garo Hills a·jani police official-rang skie on·angaha.
Skatang simsakgija gari gorarangko salenganichi ramarango bang·en a·sel ong·anirangko nikna man·engani gimin manderangkoba simsake gari gorarangko salchina aro dongimin traffic-ni niamrangko ja·rikchina gitaba East Garo Hills a·jani police officer-rang didiataha.
