SHILLONG: Meghalaya a·doko Indo-Bangla simarangko kapenganio dingtang dingtang neng·nikanirangko chagrongna nangengoba da·o bang·bata biaprangon sima kaanirang matchotengaha ine kobor on·aha.
Robibar salo BSF official saksani u·iatani gitade, Meghalaya a·doko da·o dipet Indo-Bangla simani kilometre 337.869-ko fencing kamanaha aro da·o km 20.363 ong·gipa simakoba fencing kaengaha.
Meghalaya a·dokni gisepo Bangladesh a·songni sima baksa nangchapgipa gimik km 444.857 dongachim ine BSF official aganaha.
BSF official-ni parakatani gitade, Meghalaya a·dok ning·o donggipa km 72.217 simarangko da·o dipet fencing kana man·kujaenga.
West Jaintia Hills a·jao km 37.25, East Khasi Hills a·jao km 4.910 aro South West Khasi Hills a·jao km 0.350 ong·gipa simarangko man·chape gimik km 42 ong·gipa simarangko kana gita da·o a·a ra·ani kamrangko ka·engaha ineba BSF official parakataha.
Fencing ba sima kaaniko a·bachengode India a·song ning·o 150 yard ning·osa kaahani a·sel simarango donggipa bang·bata songrangkon Bangladesh a·songchipakna man·angahani gimin ja·mano a·dok sorkari, zero line-o kachina gita National Building Construction Corporation (NBCC)-na ge·etaniko on·ahachim.
Fencing-rangko India a·songchipak 150 yard ning·osa kaahani a·sel bang·bata songrangan India a·songoni watchanggalako man·na kenenba songni nokni manderang sorkarina badi ka·doangahachim.