SHILLONG: COVID-19 sajinmani somoio bang·a me·chikrangan sabisi man·na kenenba hospital-rango an·pakna jechakahani a·sel gimik sak 877 atchidaldal bi·sarang aro sak 61 ma·giparang siangna gita nangaha ine Meghalaya sorkari, National Human Rights Commission (NHRC)-na talataniko on·aha.
COVID-19 sajinmani somoio an·o donggipa me·chikrang aro atchidaldal bi·sarangni sianirang bilongahani gimin a·dok sorkarini kosako NHRC-ni gita mokordomako ka·ani ja·man Meghalaya sorkari, NHRC-na report-ko on·angaha.
“Atchidaldal bi·sarangni siani a·selko am·sandie nion, ua somoio bang·bata an·o donggipa me·chikrangan COVID-19 man·na kene aro COVID-19-na porikkarangko ra·na sikjae hospital-rango an·tangtangko admit ka·na sikjaha aro maming sanna bananirangko man·jaha ine ma·sina man·aha,” ine NHRC-na on·atgipa report-o parakaha.
Ua somoio COVID-19 man·gipa aro COVID-19 man·gijagipa manderangko ma·ekatna nangahani gimin COVID-19-ni batrikrikaniko champengna gita hospital-rango porikkarangko ra·e nina nangaha ineba report-o parakaha.
An·o donggipa me·chikrang, health centre ba hospital-rangona re·angjahaoba ANM aro ASHA-rang, nokrangona re·e, an·o donggipa me·chikrangna agan-ku·pattianirangko aro hospital-rangona re·ange an·pakchina didiahachim ineba NHRC-na on·gipa report-o parakaha.
Sianirang batroroahani gimin a·dok sorkari, dingtangmancha ‘rescue mission’-ko a·bachengataha aro sanna bananirangko on·gipa dolrangko songe, an·o donggipa me·chikrangni aro atchidaldal bi·sarangni sianiko champengna gita an·o donggipa me·chikrangko sandie, mobile application-rango register ka·aha ineba a·dok sorkari parakataha.