Song dam 3-o KVK-ni animal health camp-ko ong·ata

TURA: Adita salrangna skang, West Garo Hills a·jani ning·o donggipa ICAR-KVK-ni gita animal vaccination aro health camp-rangko Gambegre Block-ni ning·o donggipa Meboldarechikgre, Aminda Simsang aro Nengja Bolchugre songrango ong·atangaha.
Ia health camp-rangko ong·atanio manderangni jilenggipa wak aro matchurangna dingtang dingtang sabisini tikarangko su·e on·angaha aro tikarangko su·e on·angan baksana matburingrangni sabisi sakanchirangko sanne banne on·angaha.
Ia songgittamo health camp-rangko ong·atanio gimik mang 82 wak aro mang 212 matchurangna tikarangko su·e on·na man·aha ine KVK official-rang parakataha.
Ia health camp-rangko ong·atanio manderangni jilenggipa matchu, do·bok, wak aro do·orangni ma·manti sabisirangna sanna banani cholrangkoba songni manderangna agan-skie on·angaha.
Ia camp-rangko ong·atanio TSP project-ni ning·o dingtangmancha sak 152 game ge·e cha·giparangna aro matchu matte jile cha·enggiparangna matchu matterangni sam aro vitamin-rangkoba suale on·angjolaha.
Tikarangko aro sanna bananirangko KVK-ni official Dr Sagarika Borah dakdilangaha.