TURA: Garo Students Union (GSU) Phulbari regional unit-ni election-ko ong·atna gita GSU Western Zone (North) Dadenggre-ni election commission songaniko GSU Western Zone (West) Raksamgre jegalskaaha.
GSU Western Zone (West) Raksamgre-ni general secretary Tengroang Marak-ni parakatani gitade, GSU WZN Dadenggre-ni gitcham president Rupa Marak, kamtangko watgija 2018 bilsini Assembly election-o susaani ja·man ia zone-ko bon·atahachim aro da·o Tengsan Marak minggipa mandeni an·tangko GSU WZN Dadenggre-ni president ine a·kange Phulbari unit-ni election-ko ong·atna election commission-ko songaniara niamni a·palosa ong·engachim.
“GSU WZN Dadenggre-ni gitcham president Rupa Marak, kamtangko watkujaengon maikai Tengsan Marak, an·tangko Western Zone (North)-ni president ine a·kangna man·aha? Regional unit-rang aro GSU central executive committee baksa maming agangrikchenga gri sawa uko WZN-ni president songaha? Phulbari unit-na election-ko ong·atna nanggenchimode Western Zone (West) Raksamgre aro CEC Hq Tura-oni chanchirimesa election commission-ko songna man·a. GSU WZW Raksamgre aro CEC Hq Tura-na maming u·iatchenggija an·tangko president ine a·kangenba Phulbari unit-na election commission songaniara niamni a·palo ong·enga,” ine GSU WZW Raksamgre-ni general secretary parakataha.
GSU Phulbari regional unit-ni gital dilgiparangko re·anggipa jaon CEC-ni president Tengsak Momin ra·chakmanaha ine talataniko on·angengon, CEC-ni ra·chakgiminko jegale election ong·atna commission-ko songdragenchimode ian mikkangchi GSU-ni gisepo so·sojengjeng ong·kataniona sokgen aro GSU-na namgijagipa bimingko ra·baani ong·gen ine Tengroang Marak, mikrakataniko on·angaha.