SHILLONG: Re·anggipa bilsini November jao All India Trinamool Congress (AITC)-ko Meghalaya a·doko a·bachengatani ja·man da·o a·dokni bang·bata constituency-rangon block unit-rangko songe bilakbaroroengaha ine AITC-ni dilgiparang parakataha.
AITC-ni vice president HM Shangpliang-ni kobor ra·timgiparangna parakatani gitade, Garo Hills-osan ong·aigija AITC dol da·o Khasi aro Jaintia Hills a·jarangoba bilakbaroroengaha aro uandaken, Mawsynram, Umroi, Sohra, Ranikor aro Nongstoin-oba block unit-rangko songe on·manaha.
“Pynursla-oba chinga block unit-ko Sonibar salo songe on·anggen aro Sohiong-oba April 16 tariko block unit-ko songgen. Mawthadraishan-oba AITC-ni block unit-ko songna gita chinga kamrangko ka·enga,” ine Shangpliang parakataha.
TMC-ni ma·dot aro West Bengal-ni Chief Minister Mamata Banerjee-ko Shillong-ona rimbana chanchienggipani bidingo sing·on, West Bengal Legislative Assembly-ni budget session matchotahaon, Meghalaya a·doko AITC-ni kamrangko ka·ani bidingo uamang, AITC-ni Meghalaya I/c Manas Ranjan Bhunia baksaa agangrikanggen ine Shangpliang parakataha.
2023 bilsini Meghalaya Assembly election-na AITC-ni candidate-rangko dingtang dingtang block-rango sandienga ine talataniko on·angengon, candidate-rangko seokna gita block-tangtangon nanga kamrangko ka·anggen ine AITC Meghalaya-ni vice president parakataha.
AITC-na kam ka·enggipa manderang dingtanganiko nangniktokengani gimin kam ka·giparang ka·oksibee kamrangko ka·tokengaha ineba Shangpliang parakataha.
Re·anggipa 2021 bilsio Congress dolni sak 12 MLA-rang AITC-o napangani ja·man Meghalaya a·doko AITC dolan mongsonggipa opposition dol ong·skaahachim ine nikna man·a.