SHILLONG: Bristibar saloni Sukrobar salona konta 24-ni gisepo Meghalaya a·dok gimiko sak 7 manderang COVID-19 man·dapaha indiba ia konta 24-ni gisepo a·doko COVID man·e sigiparang dongskajaha.
Konta 24-ni gisepo COVID-19 man·dapgipa sak 7 manderangko channe da·o Meghalaya a·dok gimiko COVID-19 man·e dongenggiparang sak 51 gapengaha.
Konta 24-ni gisepo COVID man·gipa sak 7 manderangoni sak 2-de East Jaintia Hills-o, sak 1-de Ri Bhoi a·jao, sak 1-de South West Garo Hills-o, sak 1-de South West Khasi Hills-o, sak 1-de West Jaintia Hills-o aro sak 1-de West Khasi Hills a·jao ong·a.
Ia apsan salon gimik sak 6 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 92,110 gapskaengaha.
Da·o dipet Meghalaya a·doko COVID-19 man·e sianggiparang gimik sak 1593 gapskaengaha.