SHILLONG: NPP-ni rikdilenggipa MDA sorkarina chakpaaniko on·ani gimin party-oni ra·galako man·gipa sakbonga Congress MLA-rangni kosako ja·ku ga·na gita All India Congress Committee, skeljaenga gita nika.
Uamangni kosako chanchina gita party da·omitingo tom·a dongkujaenga ine Meghalaya Pradesh Congress Committee president, Vincent Pala aganaha.
Party-oniko ra·gala man·gipa sakbonga MLA-rangni kosako maiko dakgenchim, uani bidingo Parliament-ni Budget Session matchotosa chanchiaignok ineba ua aganaha.
MDA-na chakpaaniko on·ani gimin, ra·galako man·gipa sakbonga Congress MLA-rangna skangon show cause notice-ko on·manahachim, indiba da·alona kingkingba uamangoni saksaba show cause notice-na aganchakgipa dongkuja.
MDA sorkarina chakpaaniko on·ani gimin, CLP dilgipa Ampareen Lyngdoh, Mohendro Rapsang, Mayralborn Syiem, PT Sawkmie aro Kimfa Marbaniang mangko Congress party-oniko ra·galahachim.
Minggipinara, ia sakbonga Congress MLA-rang r·ugitjan ba ja·mano Congress-oni ong·kate gipin political party-rango napnasienga ineba jangtokenga.
Do·mitingode Congress, Meghalaya-o bilgribatgipa ong·enga. Congress, jean a·doko ru·uta bilsirangna sason ka·ahachim, ra·galako man·gipa sakbonga MLA-rangko chanjahaode uamango MLA saksaba dongjaengha.
