TURA: Tura Civil Hospital-ni Medicine department-o Dialysis unit-ko kuliahani gimin da·ode Garo Hills-ni manderang, gipin biaprang, jekai Guwahati, Shillong aro uandakgipa dal·dalgipa biaprangona re·ange dialysis-ko dakna nangjawaha ine Sonibar salo, a·dokni Chief Minister Conrad K Sangma parakataha.
Sonibar salo ia dialysis unit-ko West Garo Hills a·jani Deputy Commissioner Ram Singh aro dingtang dingtang officer-rangni mikkango a·dokni Chief Minister, a·bachengate on·angaha aro ia dialysis unit-ko a·bachengate on·angani somoio ua iako parakangaha.
“Batanggimin sal somoirango Garo Hills-ni manderang dialysis-ko dakna gita Guwahati aro uandakgipa dingtang dingtang biaprangonasa re·ange dakna nangani a·sel bang·bea tangka paisarangko koros ka·na nangrongachim indiba da·ode Tura Civil Hospital-o dialysis unit-ko kuliahani gimin ma·manti saa donggipa manderang ia biapon sannanirangko ra·na man·gnok,” ine Sangma aganaha.
Meghalaya a·doko sanna banani cholrangko aro songadam nokadamrango donggipa health centre-rangko namdapatna sorkari kam ka·enga ine janapatengon, iandakgipa kamrangna sorkari, ia bilsini gisepo bang·bata tangka paisarangko chamaha ine Chief Minister parakataha.
Dalu CHC-na antignini gisepo ultra sound machine-ko sokate on·gnok ineba ia tom·anio Chief Minister parakataha.
TCH-ni Dialysis unit-ni a·bachengate on·angani somoio West Garo Hills a·jani Deputy Commissioner Ram Singh-ba jinmana aganprakangengon, Tura Civil Hospital-o trauma centre-ko kulina nangengani gimin aro songadam nokadamrango donggipa health centre-rango sanna banani cholrangko namdapatna nangengani gimin aganangaha.
Iana skang, Dialysis unit-ni Nodal Officer Dr Aaron KM Sangma-ba jinmana aganprakengon, kangal cholgri manderangba da·o koros komibeachi dialysis-rangko dakpana man·gnok ine parakangaha.
Ia tom·aniko Tura Civil Hospital-ni Senior Specialist Dr Tema B Sangma dilangaha aro rimchaksoani kattarangko Medical Superintendent Dr IC Marak aganangskaaha.
