TURA: Re·anggipa March 21 tarikoni A·chikrangni doka dam·ani aro Wangala chrokaniko skie on·na gita A·chik Literature Society (ALS) aro NEHU Tura Campus-ni ning·o donggipa Garo Department-ni nangrime ong·atanggipa regional workshop-ko March-ni 25 tariko dingtangmancha Valedictory function-ko ong·atenba matchotataha.
Ia valedictory function-ko ong·atanio Garo Hills Autonomous District Council (GHADC)-ni Chief Executive Membor (CEM) Albinush R Marak, mongsonggipa sokgipa ong·e, jinmana aganprakangengon, a·gilsakni seng·aniko skie ra·an baksana jatni doka dam·ani, sika-moani, minga-ring·anirangkoba skie ra·china aro jatni dakbewal-rikbewalko niksengatchina gita A·chik chadamberangko didiangaha.
A·chik jatni dakbewal rikbewal aro manianirangba jolni kri dingtanggrika ine janapangengon, ia daka rikani aro maniani bewalrang gimaangengahani gimin iarangko see rakkichina gitaba ua didiangaha.
Ia workshop-o skie ra·gipa chadamberangkoba songtangtang noktangtangona re·angpilahaon, an·tangtangni skie ra·gimin changa sapanirangko sakgipinrangnaba skie on·skachina aro jatni daka rikaniko A·chik a·song gimikon gipatchina gitaba Marak didiangaha.
Ia workshop-ko matchotatani somoio NEHU Tura campus-ni Campus-in-Charge Prof G Singaiah-ba dongpae jinmana aganprakangengon, iandake changa sapani aro janggi tangani cholrangko mesoke on·gipa program-rangko ong·atjringna nangani gimin aganangaha. Mikkangchi gipin jatrangnaba A·chikkuko skie on·ani diploma course-rangko aro janggi tangani chol gita dingtang dingtang changa sapanirangko mesoke on·gipa (skill development program-rangko ong·atchina gitaba ua NEHU Tura campus-ni Garo Department-ko didiangaha.
Jatni doka dam·ani aro sika moani bosturangko tarina skie on·an baksana jatni chrokanirangko skie on·na gita ia workshop-ko ong·atahani giminba Prof Singaiah, dingtangmancha ALS aro NEHU Tura campus-ni Garo Department-ko mittelpilangaha.
Ja·mano, ia workshop-o skie ra·gipa sak 37 me·asarang aro sak 74 me·chikrang baksana workshop-o skie on·gipa sak 7 manderangna, GHADC-ni CEM Albinush Marak, GHADC-ni Chairman Sengchim N Sangma aro GHADC-ni Executive Membor Haat I/c AB Marak-ni jakchi certificate-rangko suale on·angaha.
Ia salbongana ong·atanggipa workshop-o skie on·gipa manderangara, Selbalgre-oni Ringjeng T Sangma aro Sotjak Ch Marak, Rombagre-oni Dewal M Sangma aro Lindinbirth S Sangma, Gondenggre-oni Dirot Ch Marak aro Silgra Ch Marak, aro Raksamgre-oni Tengchon R Marak ong·achim.
