TURA: Election-ko ong·atani gri Garo Students Union (GSU) Phulbari regional unit-ni gital dilgiparangko songaniara GSU-ni constitution-ko pe·ani gita ong·enga ine Phulbari Garo Students Committee (PGSC) parakatenba, ia unit-ni gital dilgiparangko seokna gita GSU-ni niamo pangchake election-ko ong·atchina dabiangaha.
PGSC-ni president George Ellioth R Marak-ni parakatani gitade, Phulbari regional unit-ko bilsi 10 batpile chalaigija donani ja·man ia unit-ko GSU Western Zone (North) Dadenggre bon·atahachim indiba ia unit-ni gital dilgiparangko niam gri, adita salrangna skangsan Tura-o donggipa GSU-ni central executive committee (CEC) songe donangskaahachim.
“Phulbari unit-ni gital dilgiparangko seokna gita bilsi 15-mang ong·pile election-ko ong·atchipjahani giminsa PGSC-ko bikotahachim. Indiba adita salrangna skang ia unit-ni gital dilgiparangko GSU-CEC maming niam gri aro election-ko ong·atchenggija songaha aro chinga iako raken jegalenga. Phulbari unit-ni gital dilgiparangko seokna gitade election-ko ong·atchengna nangchongmota,” ine PGSC-ni president parakataha.
Batanggimin somoirangonin GSU Phulbari regional unit-ni gital dilgiparangko songani bidingo GSU Dadenggre aro Phulbari unit-ko dilna songako man·gipa gital dilgiparangni gisepo meligrikgijanirangko nikna man·engachim.
GSU Phulbari unit-ni gital dilgiparangko seokna gita GSU Dadenggre zone, re·baenggipa April jao election-ko ong·atna tik ka·manahaon iako GSU Phulbari unit aro GSU Western Zone (West) Raksamgre-ni general secretary-na jegalatskaahachim.
